Kryetari i PDK-së, Memli Krasniqi ka thënë se me 5, 6 dhe 7 mars të vitit 1998 në Prekaz të Drenicës, fjalët qëndresë, sakrificë, guxim e krenari, morën kuptimin e vërtetë, ku siç tha ai, u përbashkuan në një familje me një mbiemër, familja Jashari.
Krasniqi tha se secili anëtar i familjes Jashari, u bë fanar shprese në luftën e përgjakshme për çlirim të vendit.
“Me 5, 6 dhe 7 mars të vitit 1998, në Prekaz të Drenicës, fjalët qëndresë, sakrificë, guxim e krenari, morën kuptimin e vërtetë. Ato u përbashkuan në një vend, në një familje dhe në një mbiemër: familja Jashari! Heroizimi dhe sakrifica e familjes Jashari, mishëron shpirtin e një kombi të etur për liri. Secili anëtar i familjes Jashari, u bë fanar shprese në luftën e përgjakshme për çlirim. Nga baca Shaban e te nana Zahide, nga Hamza e te Blerina, nga Ademi e te Kushtrimi 13 vjeçar, pushka e të cilit shkrepi e fundit në atë betejë”, shkroi Krasniqi në Facebook.
Ai tutje u shpreh se për tri ditë, familja Jashari kthehu çdo gur të Prekazit në monumente të lavdisë.
“Për tri ditë, familja Jashari ktheu çdo gur të Prekazit në monumente të lavdisë që do të jetojë përgjithmonë në mendjet dhe zemrat e secilit shqiptar deri në mbarim të kohës”, shkroi Krasniqi./teve1.info/
