Kosova dhe Arabia Saudite janë pajtuar që të fillojnë procedurat për lidhje të marrëveshjes në fushën e aviacionit civil.
Kjo është bërë e ditur pas takimit që ka zhvilluar zëvendësministri i Punëve të Jashtme dhe Diasporës, Kreshnik Ahmeti me ministrin e Transportit dhe Logjistikës së Arabisë Saudite, Saleh bin Nasser bin Alali Aljasser.
“Në takim u bisedua për raportet e shkëlqyera midis dy vendeve dhe mundësitë për rritjen e bashkëpunimit. Palët u pajtuan që të fillojnë procedurat për lidhjen e marrëveshjes në fushën e aviacionit civil, e cila do të lehtësonte udhëtimet e qytetarëve mes Prishtinës dhe qyteteve të ndryshme të Arabisë Saudite”, thuhet në komunikatë.
Po ashtu, Ahmeti u takua me kryetarin e Grupit Parlamentar të Miqësisë Kosovë – Arabi Saudite, Khaled Mohammed Albawardi.
Në takim është biseduar për zhvillimet ekonomike dhe të sundimit të ligjit në Republikën e Kosovës dhe për rritjen e bashkëpunimit parlamentar mes të dyja vendeve.
“Në takimin e radhës, zëvendësministri Ahmeti u prit edhe nga zëvendësministri për Punë të Jashtme të Jemenit, nga i cili u informua mbi kontekstin historik dhe zhvillimet e fundit në Jemen. Të dy zëvendësministrat shqyrtuan mundësitë e bashkëpunimit mes të dyja vendeve. Ndërsa, në takim me drejtorin e Fondit Saudit për Zhvillim, Sultan Abdulrahman Al-Marshad, u diskutua mbi projektet aktuale infrastrukturore rrugore, projektet e ardhshme të infrastrukturës sportive dhe investimet në energjinë e ripërtëritshme. Në takim ka pasur dakordim për vazhdimin dhe thellimin e mëtutjeshëm të bashkëpunimit actual”, thuhet në komunikatë.
Ndryshe, Zëvendësministri i Punëve të Jashtme dhe Diasporës, Kreshnik Ahmeti, sot ka përmbyll vizitën zyrtare në Arabinë Saudite./teve1.info/
