Ndërkombëtarët po vazhdojnë insistimin e tyre për Kosovën dhe Serbinë që të përmbushin obligimet e marra nga procesi i Brukselit.
Dialogu ishte njëra nga temat edhe në takimin e së mërkurës që kryeministri Albin Kurti pati me të dërguarin e Posaçëm të Mbretërisë së Bashkuar për Ballkanin Perëndimor, Lord Stuart Peach.
Deklarimet që kohëve të fundit vijnë nga përfaqësuesit amerikanë, janë cilësuar si më të prera, për palët.
Profesori universitar Dorajet Imeri thotë se presionet aktuale të ndërkombëtarëve janë të iniciuara edhe nga situata e sigurisë në rajon.
“Ky presion vjen për shkak se situata mund të dal lehtësisht nga kontrolli dhe se Shtetet e Bashkuara të Amerikës e shohin me shumë shqetësim, nëse situata nuk është e menaxhushme në rajon për shkak të implikimeve të mëdha gjeostrategjike që mund të ketë pastaj … Rrethi po ngushtohet është e qartë. Obligimet duhet të kryhen Serbia nuk guxon të marr veprime sikur që ka bërë më përpara, natyrisht Kosova duhet t’i kryej obligimet e saj, që të mos i jep shkas Serbisë për të bërë këso veprimesh”, ka thënë ai.
Njohësi i çështjeve politike Driton Lajçi thotë se ka një unitet transatlantik për normalizimin e marrëdhënieve mes Kosovës dhe Serbisë.
“Kemi një punë të përbashkët, më dinamike, më konkrete më të vendosur më serioze ndërmjet Bashkimit Evropian dhe Shteteve të Bashkuara të Amerikës … sigurisht se kjo duhet të ketë ndikim serioz edhe te palët të cilat janë të përfshira dhe të obliguara që të normalizojnë marrëveshjet ndërmjet Kosovës dhe Serbisë. Unë pres edhe si me thënë edhe dinamikën tjetër dhe elementet e tjera të cilat do të përfshihen në këto relacione. Politika e “karotës” dhe “shkopit” do të thotë është pjesë e kësaj”, ka thënë Lajçi.
Ndonëse është paralajmëruar nga ndërmjetësuesit se këto kohë do të ketë një dinamikë më të shtuar në kuadër të dialogut, deri më tani nuk ka ende një datë për ndonjë takim mes palëve në Bruksel.
