Mbeturina të shumta janë mbledhur qosheve.
E dyshemetë e klasave janë mbushur me pluhur.
Ndërsa në dhomën e vogël të shkollës ‘’Abdyl Frashëri’’ në Komunën e Prishtinës, tash e katër ditë po mbajnë grevë punëtorët teknik privat.
Ato zgjodhën të mos pastrojnë shkollën, për të kërkuar pagë më të lartë dhe nivelizim të saj me të sektorit publik.
“Sot është dita e katër që jemi në grevë, normal shkolla është e papastër po duhet me vazhdu qeshtu derisa të bëhet një zgjidhje”, thotë Sheri Fazliu – punëtore
E gjendje jo më pak e mirë është edhe në katin e dytë e të tretë të shkollës ‘’Hoxhë Kadri Prishtina’’.
Përveç mbeturinave të hedhura në tokë e disave të lëna nën bankat shkollore, shenjave të këmbëve dyshemeve të klasave, të papastërtia janë edhe banjot e kësaj shkolle.
Mes gjithë këtyre, korridoreve qëndrojnë mjetet e pastrimit, të paprekura tash e katër ditë nga punëtorët teknik.
“Prej ditës që kemi fillu, papastërtia është e madhe, sidomos pluhur e ku ta di unë, megjithëse këta po i angazhojnë nxënësit një pjesë të bërllokut me heqë, mirëpo me pluhur s’po merret kërkosh me to”, thotë Feim Bislimi
Ndërsa në shkollën ‘’Ismail Qemajli’’, nxënës e mësues kanë ndërmarrë aksion pastrimi që nga mëngjesi i së enjtes.
Për të mundësuar mbajtjen e mësimit, ata janë angazhuar së bashku në pastrimin e klasave e mirëmbajtjen e korridoreve.
Përkundër kësaj, në shkollë ka ende mbeturina.
Ndërsa shqetësimi i tyre për pagat vazhdon.
Që nga dita e djeshme, Sindikata e Pavarur e Sektorit Privat ka bërë të ditur se komuna e Prishtinës do të ofrojë ofertën për rritjen e pagës për punëtorët që janë në grevë, mirëpo një gjë e tillë nuk është realizuar akoma.
Ndërsa, në orët e pasdites nënkryetarja e Komunës së Prishtinës, njëherit u.d. së drejtoreshës së Arsimit, Jehona Lushaku, ka bërë të ditur se greva e punëtorëve teknikë është ndërprerë, pasi që iu janë rritur pagat.
