Janë ndër mjetet më të sofistikuara për deminim.
Pikërisht në ditën ndërkombëtare të deminimit, Forca e Sigurisë së Kosovës vendosi t’i prezantojë mjetet që i posedon.
Pjesë e këtij prezantimi ishte edhe zv.ministri i Mbrojtjes, Shemsi Syla bashkë me udhëheqës të FSK-së.
Aty ai u njoftua me punën e bërë nga pjesëtarë të këtij njësiti në kuadër të Forcës së Sigurisë së Kosovës.
“Gjatë këtyre viteve ka pasur mbi 4 mijë thirrje që i është përgjigjë po ashtu ekipet e pastrimit në terren kanë bërë një punë të jashtëzakonshme. Në kuadër të 63 milionë metra katrorë një kontribut jashtëzakonisht të madh ku e kemi prej vitit 2010 deri në 2023 që nga koha që kemi marrë përgjegjësi të plota janë mbi 7 milionë metra katrorë të pastruara dhe kemi 13 mijë e 224 mjete të asgjësuara me fishekë, me pjesë tjera përbërëse në operacionet tona”, tha Petrit Loxha – oficer për operacione në kompaninë e deminimit
Derisa aty u fol edhe për specifikat e këtyre mjeteve deminuese.
“Kjo është një pajisje e cila na ndihmon me bë shkatërrim të mjeteve nga distanca deri në 3 kilometra, bën demolim ka mundësi 4 shkrepje (demolime) në të njëjtën kohë me i bë, edhe në mënyrë të sigurt. Ky është një detektor që e detekton llojin e eksplozivit”, u shpreh Toger Buqaj.
Pjesë e këtij organizimi ishin edhe disa organizata ndërkombëtare që japin kontributin e tyre në këtë fushë.
Edhe përfaqësuesit e tyre prezantuan mjetet por edhe të arriturat e tyre përgjatë këtyre viteve në Kosovë.
I impresionuar me këtë punë u pa edhe numri dy i Ministrisë së Mbrojtjes, i cili i inkurajoi ata në vazhdën e sukseseve të reja në ç’minime.
“Është punë kolosale, çdo metër katrorë ka mundur ta ketë një rrezik për jetë ju jeni ata që e keni eliminu atë rrezik për jetë dhe njerëzve ua keni siguru jetën, ua keni vazhdu jetën”, tha Syla.
Kompania e deminimit funksionon nga vitit 2001 ku nga transformimi në FSK prej vitit 2009 ka pasur përgjegjësi të plota edhe të reagimit në operacione të ndryshme, e që në strukturë ka 124 pjesëtarë.