Shkëlzen Sopjani, ekspert i sigurisë, thotë se deklaratat e sotshme të ndërkombëtarëve ndaj Kosovës kanë qenë shumë “më të buta” se sa ato të së hënës.
Ai vlerëson se Kosova është dashur të koordinohej dhe të diskutonte paraprakisht me partnerët, para se të merrte vendime për tri komunat veriore.
“Edhe u pa qartë se deklaratat e sotit ishin shumë më të buta ndaj Qeverisë së Kosovës, edhe shumë më të balancume sesa deklaratat e së hënës. Sepse u pa që të hënën target primar ose edhe i vetëm ishin institucionet e Kosovës. Mua më kanë habit ato reagime të hënën me thënë të drejtën, më kanë habit jashtëzakonisht shumë…unë mendoj personalisht që ka të bëjë me aspektet gjeopolitike të interesave edhe të partnerëve tanë, por edhe tonat. Do duhej të koordinoheshin paraprakisht, edhe të diskutoheshin, edhe të pajtoheshin paraprkaisht. Sepse partnerët tanë e kanë interes që ta largojnë Serbinë jashtë ndikimit rus”, deklaroi ai në “Ditari” në Tëvë 1.
Sopjani potencoi se largimi i Policisë së Kosovës në tri komunat veriore është paksa i rrezikshëm, pasi siç thotë ai, “kjo është një lloj dorëzimi i asaj pjese”.
Kryeministri i vendit, Albin Kurti ka mbajtur sot një takim me ambasadorin amerikan në Kosovë, Jeff Hovenier. Me këtë rast, Hovenier ka thënë se SHBA-ja do ta inkurajojë Kosovën edhe më tutje për depërshkallëzim të situatës në veri.
Teksa ka deklaruar se po presin hapa edhe nga Serbia, për një situatë më të mirë në komunat veriore të Kosovës.
Sipas Hovenierit, depërshkallëzimi mund të arrihet nëse kryetarët nuk punojnë nga zyrat dhe nëse njësitë speciale tërhiqen.
Teksa të martën, Hovenier ka theksuar se Qeveria e Kosovës nuk është koordinuar me Shtetet e Bashkuara për veprimet e ndërmarra të premten, e për këtë nuk do të ketë për Kosovën më stërvitje në kuadër të ushtrimit ndërkombëtar “Defender Europe ’23”. /Teve1.info/