Ende pa u bërë një javë nga vizita e pesë emisarëve në Kosovë e Serbi, mesazhet e tyre kanë filluar të japin efekt në procesin e dialogut.
Në takime të ndara, kryeministri i Kosovës, Albin Kurti dhe presidenti serb, Aleksandar Vuçiq, të enjten do të takohen me kancelarin gjerman Olaf Shcloz, presidentin francez Emmanuel Macron, kryeministren e Italisë Giorgia Meloni si dhe me përfaqësues të institucioneve të Bashkimit Evropian.
Nga BE thonë se nuk ka të planifikuar ndonjë takim mes Kurtit e Vuciqit.
Ndërkohë, Qeveria e Kosovës ka njoftuar se kryeministri Kurti ka konfirmuar pjesëmarrjen në takimin e së enjtes.
“Kryeministri Kurti i është përgjigjur pozitivisht kërkesës së 5 emisarëve për një takim me liderët e Gjermanisë, Francës, Italisë dhe Presidentes së Komisionit Evropian, në margjina të samitit të Këshillit Evropian. Takimi do jetë në kuptim të diskutimeve të nisura me 5 emisarët gjatë vizitës së tyre në Prishtinë me datën 21 tetor, në të cilin ata propozuan një plan të ri që përfshinte një paketë më të plotë të zbatimit gjithëpërfshirës të Marrëveshjes Bazike bashkërisht me një draft të propozuar për zbatimin e nenit 7”, thuhet nga Qeveria e Kosovës.
Sa i përket draftit të statutit të asociacionit që ka propozuar Bashkimi Evropian, kryetari i Kuvendit Glauk Konjufca, thotë se është në përputhje me Kushtetutën e Kosovës.
“Në një shikim sipërfaqësor, është plotësisht në përputhje me Kushtetutën e Republikës së Kosovës dhe kurrfarë niveli i pushtetit në Kosovë. Por edhe kjo nuk mendoj që është temë e negociatave me Serbinë. Nëse ndonjëherë ndodhë ndonjë draft i Asociacionit ai do të propozohet nga Republika e Kosovës, nëse ndodhë”, ka thënë Konjufca.
Belgëzim Kamberi nga Instituti për Politika Sociale thotë se sulmi terrorist në Banjska ka bërë që BE të dal me një draft për asociacionin.
“Në mungesë të prezantimit të këtij drafti dhe propozimit realisht nga Qeveria e Kosovës, tashmë jemi në një fazë që ky draft po propozohet realisht nga ndërmjetësuesit ndërkombëtarë. Kjo është edhe një hap tutje që me sa duket e ka prodhuar edhe e ka përshpejtuar po themi kështu edhe ngjarja në Banjska. Edhe duket se ngjarja në Banjskë vetëm e ka dinamizuar nevojën e zbatimit të marrëveshjes të planit franko-gjerman”, ka thënë Kamberi për Tëvë 1
Qeveria e Kosovës deri më tani ka propozuar vetëm një draft-vizion për të cilin ka thënë se është i mbështetur në modelin kroat për pakicat kombëtare.
