Deputeti i Lëvizjes Vetëvendosje, Gazmend Gjyshinca, ka thënë se Kosova nuk do t’i ikë asnjë marrëveshje ndërkombëtare të arritur më herët përfshirë edhe Asociacionit.
Ai ka thënë se ata e njohin rendin ndërkombëtar ku synojnë që Kosovën ta bëjnë pjesë të saj.
“Kosova është zotuar se të gjitha marrëveshjet që janë arritur më herët do të zbatohen. Ne njohim rendin ndërkombëtar, mëtojmë që Republikën tonë ta bëjmë pjesë funksionale me të drejta të plota brenda këtij rendi, paralelisht e kemi prioritet që shtetin tonë ta funksionalizojmë, kushtetushëmrinë e tij, ligjshmërinë, luftën kundër korrupsionit dhe krimit ta qojmë përpara”, tha ai në emisionin “InfoNata” në Tëvë1.
Gjyshinca ka thënë se përcaktimi i tyre ka qenë që nga këto marrëveshje të minimizojnë sa më shumë dëmet për Kosovën nga marrëveshjet e kaluara.
Ai ka folur edhe për propozimin e ministrit për Komunitete dhe Kthim, Nendad Rashiq për një konferencë ndërkombëtare për Kosovën dhe Serbinë.
Gjyshinca ka thënë se Rashiq ka shprehur një qëndrim të tij, duke mohuar se një gjë e tillë është e mundshme.
