Më 1 qershor të vitit 1998, rrugët e kryeqytetit u mbushën më fëmijë.
Por, në Ditën Ndërkombëtare të tyre, në Prishtinë nuk dolën për të festuar.
Këta të mitur, kishin kërkesa të një natyre krejt tjetër.
Është kjo demonstrata e mijëra fëmijëve, kundër regjimit të Beogradit.
Në duart e tyre të njoma fëmijët mbanin porosi të qarta.
Madje edhe fotografi të komandantit legjendar, Adem Jashari, i cili dy muaj para kësaj proteste ra heroikisht në Prekaz, së bashku me 10 moshatarë të po këtyre fëmijëve.
Por, si erdhi deri të organizimi i kësaj proteste?
Ish-anëtari i Këshillit Republikan të Protestave, Fadil Hysaj, thotë se atë vit për dy muaj organizuan protesta gjithë popullore.
E njërës prej tyre, iu bashkuan edhe fëmijët e shkollave të kryeqytetit.
“Mendoj që kanë qenë prej shkollave, mendoj që kanë qenë një grup i arsimtarëve. Kjo tregon deri në çfarë shkalle ka qenë trysnia dhe segregacioni..”, ka thënë Hysaj.
Hysaj tregon se sa e rëndë ishte t’i shihje fëmijët në demonstrata.
“Ne i shohim këta fëmijë në këtë protestë që sillen si të rritur dhe në njëfarë mënyrë tregon që ka ndodh diçka e tmerrshme në vitet e 90. Ky është brezi që nuk ka pas fëmijëri”, tregon ai.
E ish-zëdhënësi zyrtar i këtyre protestave, Milazim Krasniqi, thotë se kjo ishte njëri nga protestat me emocionuese.
“Ka qenë njëra nga protesta më emocionale që mund të imagjinohej, sepse ishin me mijëra fëmijë në rrugë që brohorisnin “Drenicë, jemi me ty!”, pastaj “Krejt Kosova, UÇK’”, thotë Krasniqi.
Profesori universitar në departamentin e Gazetarisë pranë Universitetit të Prishtinës, thotë se kjo ngjarje pushtoi mediat e huaja.
“Rreziku ishte shumë i madh, sepse në të gjitha anët ishim të rrethuar nga snajperistë serbë dhe nga policë, frika jonë si organizator ka qenë shumë e madhe nga mundësia e brutalitetit të policisë ndaj fëmijëve, por falë Zotit ajo kaloi në qetësi, pastaj u bë një ngjarje e madhe botërore”, shprehet ai.
Ndryshe, vetëm gjatë luftës së fundit në Kosovë nga forcat serbe janë vrarë 1432 fëmijë shqiptarë.
Kronika e realizuar nga gazetari Fidan Zejnullahu
