Ai përmes një postimi në Facebook ka njoftuar se angazhimi i qeverisë ka qenë i plotë dhe me synim që Sunny Hill edhe këtë vit të përçojë nëpër boto mesazhe pozitive nga Kosova.
Çeku ka deklaruar se problematika kryesore që ky festival nuk po mbahet në Prishtinë është toka pasi që sipas tij nuk ka të drejtë as kjo qeveri e as ndonjë tjetër ta përdorë territorin e Kosovës pa i peshuar mirë kostot, përfitimet, pasojat, kohëzgjatjet në të cilat jepet në përdorim një tokë, shkruan teve1.info.
“Procesi i vendimmarrjes kërkon kohë për të qenë i plotë dhe për të mos qenë i gabuar apo abuziv. Nuk është e drejtë t’i dërgohet letër qeverisë ku t’i kërkohet vendimmarrje e shpejtë për Sunny Hill, dhe pas një kohe të shkurtë të shfaqet njoftimi se organizimi paska ndryshuar vendndodhje. Ky lloj presioni nuk lë kohë të mjaftueshme për t’u siguruar që vendimet institucionale do të ofrojnë mbrojtje të plotë të interesit publik, madje nuk lë kohë të shikohen as aspektet ligjore”, ka shkruar ai.
Tutje Çeku ka njoftuar se Ministria Kulturës ka qenë në komunikim me bartësit e Sunny Hill për të ofruar mbështetjen për mbarëvajtjen e edicionit të sivjetmë të festivalit.
Ai ka thënë se Kosova do të mbetet vendi i organizmit të ngjarjeve rinore e argëtuese.
Ne e sigurojmë publikun rinor se në Kosovë nuk do të mungojnë ngjarjet e përmasave të ndryshme, me artistë vendorë e ndërkombëtarë. Edhe Sunny Hill gjithnjë do ta ketë derën hapur, për diskutime të qeta, e për marrëveshje transparente dhe pa presion. E presim sa më shpejt në Kosovën e saj edhe Dua Lipën me dashuri e respekt të madh. Ajo ka kontribuar si artiste e si shqiptare në imazhin tonë ndërkombëtar. Asnjëherë nuk do të lejojmë që figura e saj të keqpërdoret apo të zbehet nga debate të politikës apo biznesit”, thuhet në njotimin e Çekut./Teve1.info/
