E plotësuar
Bashkimi Evropian është duke shqyrtuar masa të mundshme ndaj Kosovës dhe Serbisë nëse të dy vendet nuk marrin hapa për de-përshkallëzim të situatës.
Kjo është bërë e ditur në deklaratë e përfaqësuesit të lartë të BE-së, Josep Borrell.
“Ndërkohë, Shtetet Anëtare po informohen për zhvillimet dhe po diskutojnë masat e mundshme që duhen marrë nëse palët vazhdojnë t’i rezistojnë hapave të propozuar drejt de-përshkallëzimit. Palët pritet të kontribuojnë në bashkëpunimin dhe sigurinë e frytshme rajonale në Evropë dhe për të kapërcyer trashëgiminë e së kaluarës. Ka pasur mjaft dhunë – ka pasur shumë dhunë. Ne kemi shumë dhunë në Evropë tashmë sot – nuk mund të përballojmë një konflikt tjetër”, thuhet në deklaratë.
BE kërkon tërheqjen e Policisë së Kosovës nga objektet komunale në veri
Shefi i politikës së jashtme të BE-së, Josep Borrell, ka thënë se Kosova duhet t’i pezullojë operacionet policore rreth ndërtesave të komunave në veri të Kosovës, si hap i parë i shtensionimit.
Borrell tha se ka biseduar edhe me kryeministrin e Kosovës, Albin Kurti, edhe me presidentin e Serbisë, Aleksandar Vuçiq, dhe se i ka ftuar “ta qetësojnë situatën menjëherë dhe pa kushte”.
“Bashkimi Evropian e dënon dhunën në veri të Kosovës. Kjo sjell në një situatë të rrezikshme. Kam pasur kontakt me Kurtin këtë mëngjes dhe presidentin serb Aleksandar Vuciq mbrëmë, dhe kam kërkuar nga të dyja palët që të marrin masa të shtensionohet gjendja. Si hap i parë pres që institucionet e Kosovës t’i heqin forcat policore nga ndërtesat e komunave në veri të Kosovës, dhe protestuesit të qetësohen”, ka thënë Borrell për gazetarët në Bruksel.
Ai, po ashtu, tha se BE-ja pret që palët të angazhohen në dialog dhe ta hapin rrugën për zbatimin e Marrëveshjes drejt normnalizimit të marrëdhënieve.
Tutje ai ka thënë se shtetet anëtare po informohen për zhvillimet dhe po diskutojnë masat e mundshme që duhen marrë nëse palët vazhdojnë t’i rezistojnë hapave të propozuar drejt de-përshkallëzimit.
“Palët pritet të kontribuojnë në bashkëpunimin dhe sigurinë e frytshme rajonale në Evropë dhe për të kapërcyer trashëgiminë e së kaluarës. Ka pasur mjaft dhunë – ka pasur shumë dhunë. Ne kemi shumë dhunë në Evropë tashmë sot – nuk mund të përballojmë një konflikt tjetër”.
