Udhëzimi administrativ i cili mundëson që mandati i kryetarëve të komunave të merret përmes peticionit nga qytetarët do të jetë gati nga 1 shtatori.
Këtë e ka bërë të ditur presidentja e Kosovës, Vjosa Osmani të mërkurën kur është pyetur për zbatimin e marrëveshjes nga ana e Kosovës për deskalimin e situatës në veri.
Osmani ka thënë se një nga pikat e marrëveshjes së Bratislavës ka qenë edhe organizimi i zgjedhjeve në katër komunat veriore, e për këtë ajo ka thënë se baza ligjore është gati.
Ajo ka përmendur se edhe reduktimin e numrit të policëve si një nga kërkesat e BE-së, e cila gjë Osmani ka thënë se ka ndodhur dhe është shprehur se Kosova do të jetë konstruktive në dialog si dy nga pikat tjera të marrëveshjes, e që sipas saj janë plotësuar kushtet edhe për heqjen e masave të vendosura nga BE-ja ndaj Kosovës, përcjell teve1.info
“Baza ligjore do të jetë gati më 1 shtator. Reduktimi i policisë ka ndodhë dhe Kosova do të jetë konstruktive në dialog gjatë takimeve në shtator. Unë pres që gjatë shtatorit BE-ja do të konstatojë se janë plotësuar kërkesat e saja drejt deaskalimit dhe do të krijohen kushte që të hiqen masat e të cilat edhe ashtu kanë qenë të padrejta”, ka thënë Osmani./teve1.info
