Ushtruesi i detyrës së kryetarit të OVL-UÇK-së, Faton Klinaku ka reaguar pasi pjesëtarët e EULEX-it dhe Zyra e Prokurorit të Specializuar të Kosovës janë duke e bastisur banesën e familjarëve të heronjve, Fahri e Bahri Fazliu në Kodrën e Diellit në Prishtinë.
Ai tha se Zyra e Prokurorit të Specializuar në Hagë, në mungesë të fakteve, po vazhdojnë me filmat e tyre.
“Zyra e Prokurorit të Specializuar në Hagë, në mungesë të fakteve, vazhdojnë me filmat e tyre.
Që në orët e para të mëngjesit të sotëm kanë filluar bastisjet e banesës së familjes së heronjve Fahri e Bahri Fazliu në ‘Kodrën e Diellit’ në Prishtinë. P.S ZPS janë të poshtër, meqenëse nuk ka shtet serioz”, ka shkruar ai.
Ndryshe, bastisja ka nisur në orët e mëngjesit dhe siç raporton gazetarja e Tëvë 1, Lendrina Kodrolli e cila gjendet në vendin e ngjarjes, bastisja është duke vazhduar në banesën e tyre në Breg të Diellit.
Aty po qëndron edhe avokati i familjes Artan Çerkini.
Teve1.info ka dërguar pyetje në adresë të Gjykatës Speciale dhe EULEX në lidhje me arsyen e kësaj bastisje, por deri më tani nuk ka pranuar përgjigje.
Prokuroria Speciale dhe EULEX po kryen bastisje në banesën e dëshmorëve Bahri e Fahri Fazliu
