Nën akuzat se kanë shkelur urdhërat e trupit gjykues, të enjten Zyra e Prokurorit të Specializuar ka kërkuar që të akuzuarve Hashim Thaçi, Kadri Veseli dhe Rexhep Selimi, t’u pezullohen vizitat dhe të gjitha komunikimet, përveç me ekipin e avokatëve.
Deri te ky vendim erdhi pasi sipas ZPS-së, është zbuluar identiteti i dëshmitarëve të mbrojtur dhe është shpërndarë përmbajtja e dëshmisë konfidenciale për personat që i vizitojnë në Qendrën e Paraburgimit.
E një kufizim i tillë nëse zgjatet, sipas avokatit Arbër Jashari është shkelje ligjore.
“Po shpresoj që ky ndalim i vizitave të ketë efekt të përkohshëm, përndryshe nëse kjo do të zgjasë për një periudhë kohore më të gjatë atëherë paraqet rrezik shumë të madh për shkeljen e të drejtave të atyre personave që gjendjen në atë qendër të ndalimit”, ka thënë Jashari.
Por ndryshe mendon avokati Ardian Bajraktari.
Sipas tij këto masa mund të vijnë si shkak i sigurisë së mbarëvajtjes së procesit.
“Opinioni u njoftua me një deklaratë që përfshinë disa komunikime siç pretendohet të paraburgosurve me persona të caktuar të cilët natyrisht ishin të redaktuar e në bindjen time këto kanë qenë rrethanat që kanë determine ose përcaktu ndërmarrjen e masave të tilla të natyrës kufizuese. Vlerësoj që platë mbrojtëse duhet t’i kenë të kompletuara informatat në mënyrë që të shfrytëzojnë të drejtën e tyre për të ankimuar këto vendime”, thotë Bajraktari.
Krahas masave kufizuese, Prokuroria e Specializuar ka kërkuar që tre të akuzuarit të ndahen nga të paraburgosurit e tjerë që janë në Qendrën e Paraburgimit aktualisht.
