Në fshatin Rudar të Zveçanit, të martën Policia e Kosovës në dy lokacione, shtëpi të pa banuara, gjatë një aksioni hasi në një sasi të konsiderueshme armatimi.
I gjithë municioni, armët e gjata, shok-bomba, maska, jelek anti-plumb, veshje ushtarake të kamufluara me të policisë dhe pajisje tjera ushtarake, u ekspozuan në drejtorinë rajonale të policisë në veri.
Ministri i Punëve të Brendshme, Xhelal Sveçla, ka thënë për Tëvë1 se ky armatim i takon grupit të Millan Radojiçiq, ndërsa këto lokacione u përdorën edhe më herët për tu strehuar terroristët serb, duke sulmuar dhe bllokuar Policinë e Kosovës.
“Është e qartë se kjo ka qenë si lokacion logjistik, për barrikadat e mëhershme, depo apo vend strehim për armatim luftarak, me të cilin ata kanë planifikuar të sulmojnë institucionet e Kosovës, Policinë e Kosovës, të bëjnë rezistencë ndaj shtrirjes së rendit dhe ligjit. Ka dyshim të bazuar se kjo zonë është përdorur në sulmin ndaj policisë së Kosovës, ju kujtohet kur policia e Kosovës është sulmuar në afërsi të urës”, tha Sveçla.
Këto deklarata ministri Sveçla i bëri në vendin e ngjarjes në të cilin u sekuestruan këto armatime, e me të ishte edhe drejtori i përgjithshëm i Policisë, Gazmend Hoxha.
E zëvendës drejtori i Policisë për rajonin e veriut, Veton Elshani, tha për Tëvë1 se personi i ndaluar të martën, është liruar në procedurë të rregullt, i njëjti sic ka mësuar televizioni, ka qenë zyrtar policor në rajonin e veriut.
Sipas Elshanit, për këtë rast hetimet janë duke u zhvilluar.
“ Ky rast është duke u hetuar nga inspektorati policor i Kosovës, edhe nga krimet e rënda në Prishtinë, sipas informacioneve që ne kemi, është që ai person që është intervistuar mbrëmë është lëshuar në mënyre të rregullt pas intervistimit. Hetimet janë duke u zhvilluar, me siguri do të ketë edhe zhvillime të tjera”, tha Elshani.
Gjatë ekspozimit të armëve të konfiskuara, u pa edhe një flamur serb.
