I ftuar në emisionin “Ditari” në Tëvë 1, ai thotë se ky është një vendim i duhur i Kurtit për shkak se tashmë është hyrë në fazën finale të negociatave dhe se është mirë që të ketë një unifikim sa i përket kësaj çështje.
“Në rend të parë është pozitive që Kurti ka vendosur të dialogojë me opozitën është pak me vonesë por megjithatë është vendim i duhur sepse po hyjmë në fazën finale të negociatave me Serbinë dhe është mirë që partitë opozitare së paku një nga to po besoj që edhe dy partitë do të duhej ta konfirmonin sepse nuk e shoh si i majtë, i djathtë apo social demokrat në çështjen e negociatave që lidhet direkt me çështjen e politikës së jashtme sepse duhet ta kemi një mendim”, tha ai.
Sipas tij, uniteti i politikës kosovare në procesin e dialogut është i nevojshëm edhe për faktin se tashmë në fazën që është hyrë, do të diskutohen tema më të vështira sesa ajo për letërnjoftime e targa.
Po ashtu, politologu është optimist se opozita do ta përkrahë Kurtin në këtë aspekt, sepse sipas tij të gjitha partitë opozitare kanë qenë në dialog me Serbinë.
“Sepse nëse arrijmë te një unifikim i një qëndrimi sepse tash dialogu do të intensifikohet me tema më të vështira se tabelat e targat janë të lehta në krahasim me ato që do të vijnë dhe së paku partitë ta kenë një qëndrim sesi dhe duhet të shkojmë në dialog. Po besoj që opozita do ta përkrahë Kurtin sepse ata kanë qenë në dialog çka është arrit, u arrit atë që kanë pasur mundësi dhe fuqi dhe kapacitetin por tash duhet përkrahin”, shtoi ai.
Tutje, Arifi thekson se Kosova duhet ta shfrytëzojë momentumin kur perëndimi është “anti-Serbi” për shkak të luftës në Ukrainë.
“Sepse është fazë fragjile jo vetëm në aspektin Kosovë – Serbi por në aspektin global dhe është një luftë në Ukrainë dhe ende nuk e dijnmë se çfarë po ndodhë me rendin botëror. Mendoj që ne duhet ta shfrytëzojmë luftë në Ukrainë që t’i bëjmë presion Serbisë ta arrijmë një marrëveshje sa është edhe perëndimi anti-Serbi sepse Serbia ka rënë në kurthën e vet që ka ngritë me bashkëpunimin rus ne duhet ta shfrytëzojmë këtë momentum”, shtoi ai./teve1.info/
