Në livadhet e Shajkocit të Podujevës u takuan në fillimin e prillit të vitit 1989.
Këtu Hetem Ajeti, për herë të fundit, e pa gjallë, nipin Ali Ajetin.
Me themeluesin e “Çetës së Llapit” këtu u takua me mision.
“Me 4 prill, këtu jam takua me Aliun dhe Hasan Ramadanin. Atë natë jau kom sjell diku 25 kg eksploziv. Atë natë me tha Aliu që duhet me na i gjet një vend tjetër për strehim, sepse këtu jemi zbuluar, tregon axha i heroit Ali Ajeti.
Pas kësaj, Hetem Ajeti ra në duart e policëve serb.
Ndërsa nipi, Ali Aljeti, vazhdoi me organizimin e demonstratave e sulmeve mbi pushtuesit serb.
Nëna e tij, Vahidja, tregon momentet kur i biri, Aliu, ia kërkoi hallallin.
“Unë i thashë hallall të qoftë 100 mijë herë. Tha jo valla nuk ma banë hallall.I thashë hallall të qoftë me 9 muaj që të kam bartur e që të kam rritur, i thashë je hi, nuk dua me dal, me i tradhtua shokët. Me tha jo, gajle mos ki”, shprehet nwna e dëshmorit.
Me 30 maj të vitit 1989, Ali Ajeti po printe demonstratës masive të shqiptarëve në Podujevë.
Kërkesës së shqiptarëve për “Kosovën Republikë” forcat serbe iu përgjigjën dhunshëm.
Kjo bëri që protestuesit të shpërndahen në shumë drejtime.
Ndërsa, Ali Ajeti së bashku me një grup protestuesish, morën rrugën për në fshatin Shtedim.
Këtu, Ali Ajeti u ra heroikisht gjatë një beteje me forcat serbe.
Ndërsa lajmi për vrasjen e tij, arriti në shtëpinë e familjes Ajeti.
Si e ka shti në rrymë radion, tha u vra Arben Ajeti. Jom dal prej bodrumit, thashë çka e përmendi Arbenin, tha jo Arbeni po Aliu shkoi. I thashë a u vra a u mbet gjallë? Thanë jo u vra. Thashë nuk qenka vra po paska lind për së dyti. Thashë shyqyr që nuk u zënë u gjallë, e shyqyr që pushka i ka ra djalit tem e jo në atë djalin tjetër që u kanë i hasretit” rrëfen ajo për Tëvë 1.
Në 35 vjetorin e rënies heroike të Ali Ajetit, në Prishtinë, u mbajt një akademi përkujtimore.
Fjalë të mëdha për heroin, pati kryeministri i Kosovës, Albin Kurti.
“Me 23 mars të vitit 1989, regjimi terrorist i Serbisë ia suprimoi autonominë Kosovës. 4 ditë më pas, me 27 mars të vitit 1989, disa djem nga treva e Llapit, kryen një aksion të armatosur duke e vrarë një polic e duke e plagosur një tjetër. Ata i takonin një grupi që njihej si Çeta e Llapit, i cili drejtohej ushtarakisht nga Ali Ajeti dhe politikisht nga Sabri Kiçmari. Mes dhjetëra organizatash ilegale të formuara dhe të shpërbëra në llap që në vitet e ’50-ta, Çeta e Llapit ishte organizata e parë në Kosovë që kishte karakter ushtarak të një rezistence të armatosur”, tha Kurti.
Vepra e Ali Ajetit, u bë frymëzim edhe për njërin nga komandantët më të shquar të Ushtrisë Çlirimtare të Kosovës, Zahir Pajazitin.
