Pesë persona kanë vdekur dhe dy të tjerë janë lënduar brenda pak orës gjatë mbrëmjes së ditës së shtunë në Kosovë.
Aksidentet kanë ndodhur në Pejë, Podujevë dhe Graçanisë.
Rasti në Pejë ka ndodhur në Ozdrim, ku dy persona kanë humbur jetën dhe një tjetër është lënduar, pasi janë goditur nga një veturë.
Rasti e ka konfirmuar për teve1.info, zëdhënësi i Policisë Rajonale, Driton Rugova.
“Sonte rreth orës 21:30 jemi njoftuar për një aksident trafiku, në të cilin janë përfshirë një veturë dhe tre këmbësore, dy nga ta nuk kanë arritur që t’i përballojnë plagëve, ndërsa njëri është dërguar në Spitalin Rajonal të Pejës për tretman mjekësore. Ekipet mjekësore kanë arritur në vendin e ngjarjes dhe kanë konstatuar vdekjen e dy viktimave”, ka thënë Rugova.
Ai ka bërë të ditur se drejtuesi i aksidentin gjendet në stacionin policor të Pejës.
Kurse, dy persona kanë humbur jetën, ndërsa një tjetër ka mbetur i lënduar si pasojë e një aksidenti që ka ndodhur sonte në rrugën që lidhë fshatin Sfeqël me fshatin Shajkovc të Podujevës.
Lajmin për tëvë1.info e ka konfirmuar, zëdhënësi i policisë, Agron Burovci.
“Sot rreth orës 20:30 në rrugën që lidhë fshatin Sfeqël me fshatin Shajkovc të Podujevës, ka ndodhur një aksident trafiku, ku është përfshirë një veturë. Si pasojë e aksidentit tre persona kanë pësuar lëndime të rënda trupore. Dy nga personat e lënduar nuk kanë arrit të përballojnë plagët e shkaktuara nga aksidenti dhe të njëjtit kanë vdekur. Vdekjen e viktimave e ka konstatuar ekipi mjekësor në vendngjarje”, thuhet në njoftim.
Ndërsa, një person ka vdekur pas lëndimeve të marra në një aksident komunikacioni që ka ndodhur në rrugën Llapnasellë –Graçanicë.
Lajmin e ka bërë të ditur zëdhënësja e Policisë së Kosovës për rajonin e Prishtinës, Flora Ahmeti.
Ajo për teve1.info tha se në këtë aksident janë përfshirë dy vetura.
“Sot rreth orës 16:30 kemi pranuar informatën se në rrugën Llapnasellë -Graqanicë, ka ndodhur një aksident trafiku me pasoja fatale. Në këtë aksident kanë qenë të përfshira, dy automjete, të cilat kanë qenë në lëvizje. Si pasojë e aksidentit lëndime trupore kanë pësuar dy persona, një prej tyre nuk kanë arrit të përballojnë plagët dhe i njëjti ka ndërruar jetë. Vdekjen e ka konstatuar ekipi mjekësor në QKUK. Me rastin po merret hetuesia nga njësiti i trafikut rrugor”, ka thënë Ahmeti.
