Gazetari Valmir Gallopeni i cili sot ka mbuluar protestën dhe zhvillimet e tjera në Zubin Potok, ka folur për rastin e thyerjes e më pas të djegies së veturës së televizionit.
Ai ka thënë se veturën fillimisht e kishin lënë afër një autoblinde të policisë për çështje sigurie, por më pas kjo autoblindë ishte larguar për shkuar në detyrë dhe vetura nuk ishte më e sigurtë.
“Fillimisht kur kemi shku në vendin e ngjarjes ka qenë e pamundur që me veturë të afrohemi deri te komuna apo në afërsi të vendit ku po mbahej protesta. KFOR-i nuk na ka lejuar që të vazhdojmë tutje. E kemi lënën veturën skaj rrugës magjistrale ku ka qenë në afërsi edhe një autoblindë e Policisë. Me kalimin e kohës kjo autoblindë ka dashur që të shkojë në intervenim dhe qytetarët serbë që ne dyshojmë se e kanë bërë një gjë të tillë, e kanë gjetur veturën e pambrojtur dhe e kanë sulmuar fillimisht, i kanë thyer të gjithë xhamat”, ka thënë Gallopeni.
Gallopeni ka shtuar se përveç thyerjes, veturës ia kanë shpuar edhe të katër gomat.
”Një lajm të tillë e kemi marrë nga kolegët që na kanë njoftuar përmes ekipeve që i kanë pasur në vendin e ngjarjes, te komuna ku kemi qenë duke e përcjellur mbarëvajtjen e protestës. E kemi parë që është thyer dhe e dëmtuar dhe të katër gomat janë të shfryera. Menjëherë jemi kthyer te vendi ku po mbahej protesta ku kanë qenë edhe pjësëtarët e policisë të vendosur në kordon”.
Sa i përket djegies, Gallopeni ka thënë se ka ndodhur menjëherë pas shpërndarjes së protestës, teksa ka rrëfyer edhe se si është kuptuar ngjarja.
“Kur u mor vendim që protestuesit të shpërndahen, ata brohoritën njëherë dhe paralajmëruan se nesër do të kthehën në 7 të mëngjesit. Pa u shpërndarë nga rruga, e kemi vërejtur që në rrugën magjistrale po vërehet një tym goxha i madh dhe supozimet tona kanë qenë që është djegur një veturë dhe ajo medoemos duhet të jetë e mediave. Më vonë u njoftuam që është një veturë e bardhë Pickup dhe që është e televizionit Tëvë 1”, ka deklaruar Gallopeni në emisionin Ditari në Tëvë 1.
