Zbatimi i marrëveshjes për asociacionin, është bërë një kusht i ri i vënë nga Bashkimi Evropian për shfuqizimin e masave ndëshkuese ndaj Kosovës. Njohësit e çështjeve politike thonë se kjo gjendje ka ardhur për shkak të paqartësisë së BE-së në raport me Kosovën, përderisa ka mendime se një situatë e tillë ka ardhur për shkak të qasjes së qeverisë.
Ka disa muaj që Bashkimi Evropian i ka vënë masa ndëshkuese Kosovës për shkak të tensioneve që ndodhën në komunat veriore.
Me qëllim deeskalimin, Kosova dhe BE-ja më 10 korrik kishin nënshkruar një marrëveshje 4 pikëshe, që njihet si marrëveshja e Bratisllavës. Por, kohëve të fundit ndërkombëtarët janë duke insistuar vetëm në pikën e tretë, ku po kërkojnë mbajtjen e zgjedhjeve të parakohshme në katër komunat veriore. Për këtë qeveria ka iniciuar një udhëzim administrativ që ky proces të filloi me anë të peticionit.
Pavarësisht kësaj, masat ndaj Kosovës ende nuk janë shfuqizuar, madje Presidentja e Komisionit Evropian, Ursula Von Der Leyen, tha se për largimin e tyre qeveria duhet të shënoj përparim në krijimin e asociacionit.
Njohësi i çështjeve politike Ben Andoni thotë se paqartësia e Bashkimit Evropian e sjellë Kosovën në këtë situatë.
“Kosova vazhdimisht gjendet përpara të papriturave nga pjesa e partnerit të saj në dialog që është Serbia dhe të paktën Bashkimi Evropian po të ishte më i qartë, më i saktë do të kishte mundësinë të vendoste një lloj pariteti, ky paritet do të ishte me vendosjen edhe me vendosjen e disa masave ndaj Serbisë… Paqartësia e Bashkimit Evropian, ndryshimi i rregullave të lojës, mos vendosja e masave shtrënguese ndaj Serbisë po pjell gjithë këtë lloj situate që gjendemi përballë”, tha njohësi i qështjeve politike, Ben Andoni.
Ndërsa analisti politike Arbnor Sadiku, thotë se këto masa nuk do të hiqen pa u plotësuar kërkesat e ndërkombëtarëve nga ana e qeverisë.
“Masat nuk do të hiqen deri në lëvizjen përpara të Kosovës në dy pikat kryesore që janë tashmë ngërçi kryesor ndërmjet Kosovës dhe Serbisë. Nën një është deeskalimi shumë i shkurtë dhe shkuarja në zgjedhje në veriun e Kosovës, vendosja e kryetarëve legal dhe legjitim përmes zgjedhjeve të reja atje. Dhe nën dy është krijimi sa më shpejtë i asociacionit”, deklaroi analisti, Arbnor Sadiku.
Institucionet e Kosovës prej kohësh kanë deklaruar se janë në pritje që këto masa të largohen, përderisa po kërkojnë sanksionimin e Serbisë.
