Kryeministri i Shqipërisë, Edi Rama, tha se në Asamblenë e Këshillit të Evropës u mblodhën nënshkrimet për hartimin e një Rezolute mbi atë të vitit 2011, raporton teve1.info
Përmes një postimi në Facebook, Rama ka shkruar se me këtë Rezolutë do të kundërshtohet ajo e vitit 2011 e cila pretendonte për trafikim të organeve.
Rama ka shkruar se rruga e drejtësisë për Kosovën është e gjatë, por sipas tij do të triumfoj në fund.
“I mblodhëm më në fund firmat në Asamblenë e Këshillit të Europës për mocionin për një Rezolutë të re mbi Rezolutën e vitit 2011, ku pa asnjë fakt u ngritën akuzat e tmerrshme ndaj USHTRISË SË LAVDISHME ÇLIRIMTARE TË KOSOVËS për trafikun e organeve njerëzore.
Rruga e Drejtësisë për Kosovën, gjakun e derdhur për liri, dëshmorët e UÇK-së dhe heronjtë e saj të gjallë sot në Hagë, do të jetë e gjatë, e mundimshme, madje edhe fyese deri në palcë, por Drejtësia do të triumfojë në fund fare, sepse s’ka forcë në botë që ta damkosë si kriminale një luftë çlirimtare”, ka shkruar Rama.
