Autore:Jona Kelmendi
331 aksidente në trafik u regjistruan gjatë kësaj jave.
E nga to, dy persona vdiqën.
Gjithë këto shifra po i sheh alarmante eksperti i komunikacionit, Lavdim Hamiti.
“Arsyet se pse kanë ndodh aksidentet dhe pse po ndodhin dhe pse po vazhdon numri i aksidenteve është pak alarmante sepse nuk jemi duke punuar në drejtim të parandalimit të aksidenteve apo të zvogëlimit të numrit. Përderisa nuk bëhet një riaftësim i shoferëve dhe gjobat apo pikat që i marrin shoferët që të jenë të obligueshëm që të shkojnë në shkollën për riaftësim dhe atëherë për këtë arsye po vazhdon ky numër i aksidenteve pa u zvogëluar”, thotë ai.
Në anën tjetër edhe juristi Anton Nrecaj thotë se qytetarët duhet të vetëdijësohen në këtë aspekt.
“Është shumë e rëndësishme edukimi i qytetarëve në respektimin e rregullave të komunikacionit të gjithë pjesëmarrësit në komunikacion duhet t’i respektojnë rregullat e komunikacionit sa më shumë që është e mundur në mënyrë që të evitohen situata të tilla. Shqiptimi i dënimeve natyrisht që është i paraoarë me ligj dhe masat e tilla të cilat policia po i shqiptojnë, njëkohësisht gjatë shqiptimit të gjobave duhet njëkohësisht edhe në një farë mënyre të bëjnë edhe edukimin e shoferëve”, thotë ai.
Që nga 1 dhjetori deri me datë 14 janë shqiptuar 11.042 gjoba trafiku.
Ndërsa gjatë muajit nëntor janë regjistruar 1783 aksidente ku prej tyre 8 kanë rezultuar me fatalitet, dhe janë shqiptuar 58,343 tiketa trafiku.
