Dita e 21 marsit e gjeti duke pikturuar.
Por, Zgjim Sadiku, çdo ditë ëndërron të bëhet kuzhinier.
21 vjecari i cili është me sindromën daun, këtë profesion e ushtroi për gjashtë muaj në njërin nga restorantet në Suharekë.
“Kam qeft më punu, në restorant. Shumë mirë kam kalu”, thotë ai.
Që Zgjim Sadiku e ka ëndërr të bëhet një kuzhinier, e thotë edhe nëna e tij, Elfije Sadiku.
Por ai është në pritje të një përgjigje.
“Për 6 muaj ka punuar, ma 6 muajve nuk ka punuar më, ka qef shumë më punu por kur do që shkon thonë këqyrim, këqyrim, për neve prindër është shumë e vështirë se prindi duhet me punu ka pak, prind ky po duhet me nejt në shtëpi ky po mërzitet”, thotë ajo.
Sadiku ka treguar sfidat që kishte si një nënë e re, e cila për herë të parë u bë më fëmijë, e që lindi me një kromozom më shumë.
“E vështirë ka qenë shumë, edhe sot nuk e pranoj që është me sindromën daun, nuk e pranoj shpirtërisht, por jetë është më shumë sfida, e kam pritur shumë keq, burrin nuk e kam pas këtu e kam pasur jashtë, sidomos për një nanë që përballet për herë të parë… veç ai që ka provu këtë sfidë e dinë çfarë kam kaluar. Megjithëse ky është mjalti i shtëpisë, pa këta nuk hijshe shpija”, shprehet nëna e 21- vjeçarit.
Elefije Sadiku, ka një këshillë për të gjitha nënat të cilat e kuptojnë që fëmija i tyre ka këtë çrregullim gjenetik.
“Nuk duhet me marrë së është fundi i botës, se kjo është një dhuratë prej Zotit, duhet me qenë të lumtura, unë prej këtij e kam mësuar botën ndryshe, duhet me kon edhe ato të lumtura nuk duhet me marrë se çka u bo tek këto kërkund nuk u bo. Një kujdes me të madh duhet këta fëmijë, këta janë lumturia e shtëpisë”.
E kryetari i Suharekës, Balim Muharremi, ka thënë se është sfidë për komunën punësimi i këtyre personave.
“Ju e din që duhet edhe në bazë të ligjit me i përshtatë, por kemi problem si të gjitha komunat në punësimin e tyre , se duhet me qenë një punë aduekate për ta, dhe nuk munden me punu kudo..”, tha Muharremi.
Sindroma Daun është një çrregullim kromozomesh që vjen si rezultat i vonesës në zhvillimin fizik, intelektual dhe gjuhësor.
