Me 7 shtator 1990, pak javë nga data 2 korrik e të njëjtit vit, kur u shpall Deklarata Kushtetuese, intelektualë të asaj kohe u mblodhën sërish në Kaçanik. Kësaj radhe për ta votuar Kushtetutën e parë të Republikës së Kosovës.
111 delegatë u mblodhën në orën 8:00 të mbrëmjes, në Shtëpinë e Kulturës, në mënyrë të fshehtë dhe me një plan të detajuar.
Ishin 23 minuta të asaj mbledhje të Kuvendit, që rinisën një kapitull të ri për shqiptarët e Kosovës.
E 32 vite pas, Kryetari i Kuvendit të asaj kohe, Iljaz Ramajli, rrëfen për Tëvë1, gjithë ngjarjen.
Secili delegatë me të arritur në Kaçanik, do të duhej ta kalonte një testim me fjalët; a ka syneti këtu?
Ky do ishte edhe kodi me të cilin nikoçirët do të nisnin procedurat e strehimit të delegatëve deri në orën e caktuar të mbledhjes.
Ish-policët shqiptarë, që u dëbuan nga puna pak muaj nga ajo ngjarje, ishin ndihmëtarët më të mëdhenj të mbarëvajtjes së mbledhjes.
Bile, ata kishin përgatitur plan operativ, nëse ndodhë ndërhyrja e forcave policore serbe.
Me të përfunduar mbledhja, 94 anëtarët e Kuvendit u arratisën nga Kosova, derisa 17 të tjerët një gjë të tillë e bënë katër vite më pas.
Kjo ngjarje u solli telashe familjeve, të cilat u bastisën për shumë herë nga forcat serbe.
Përveç delegatëve të pranishëm, meritorë për këtë arritjen e këtij qëllimi shumëvjeçarë, ishin edhe juristët që shkruan Deklaratën e Kushtetutës: Gazmend Zajmi, Ejup Statovci, Kurtesh Saliu, Ismet Salihu, Fatmir Fehmiu, Riza Smaka dhe Halit Muharremi.
Kronika e realizuar nga Arton Rama