Njohësi i çështjeve të sigurisë, Bedri Elezi ka komentuar prezencën e KFOR-it në zgjedhjet që po mbahen në veri.
Sipas tij, KFOR-i është aty për ta garantuar sigurinë e policëve të Kosovës dhe prezenca ushtarake në veri është e nevojshme
“Neve jemi të vetëdijshëm që plani operativ i Policisë së Kosovës ka qenë i koordinuar dhe po ashtu PK i ka bërë kërkesë KFOR-it, EULEX-it e UNMIK-ut që të marrin pjesë dhe tani edhe fizikisht po e shohim që faktikisht është diçka e pritur që të kemi prezencën e KFOR-it e cila me njëfarë forme garanton sigurinë e policëve të Kosovës. Sepse mund të themi që janë për të garantu sigurinë e policëve të Kosovës. Ushtria nuk është e nevojshme që të jetë prezente, por për shkak që situata në veri është diçka tjetër duhet të kemi edhe prezencë ushtarake”.
Sipas Elezit prezenca e shtuar e mjeteve të blinduara në veri nënkupton që nuk është situata mirë.
“Faktikisht prezenca e shtuar sidomos me mjete të blinduara nënkupton që nuk është situata mirë. Vet prezenca e uniformës ushtarake nënkupton nevojën e mbështetjes së policisë. Duhet të jemi shumë realistë në atë çfarë mund të prodhohet nga politika te siguria. Ne si shoqëri po kemi shumë problem me i kuptu veprimet politike që po i determinojnë veprimet e sigurisë”.
“Veprimet tona duhet të jenë koherente, veprime të bazuara në programe inteligjente, jo për konsum të një kategorie të qytetarëve që janë ende me elementin patriotik”, ka thënë Elezi në Edicionin Special të Tëvë 1 për zgjedhjet në veri.