Prona me sipërfaqe mbi 30 hektarë në Suharekë, e njohur si ish “Damperi”, i ka kaluar në pronësi Forcës së Sigurisë së Kosovës.
Vendimi është marrë në mbledhjen e Qeverisë së Kosovës mbajtur sot.
Kryeministri Albin Kurti ka thënë në mbledhjen e Qeverisë se përmes këtij vendimi do t’u kthehet borxhi ish-punëtorëve të Fabrikës “Ballkani”.
“Duke qenë se Damperi është aseti kryesor i Fabrikës së Ballkanit dhe punëtorët e Ballkanit me vite të tëra presin kthimin e borxhit ndaj tyre nga institucionet shtetërore, më në fund me anë të këtij veprimi të Qeverisë, do të kompensohen të drejtat e tyre”, ka thënë Kurti.
Kurse Ministri i Mbrojtjes Armend Mehaj ka shkruar se kjo pronë do t’i shërbejë FSK-së për të kryer trajnime dhe aktivitete të tjera.
“Kësisoj dhjetëra hektarë do të jenë në shërbim të Forcës së Sigurisë së Kosovës për zhvillim të trajnimeve dhe aktiviteteve të tjera të parapara në kuadër të planit operacional të FSK-së”, ka shkruar Mehaj në Facebook.
