Mbi 3 mijë të vdekur në rrugët e Kosovës janë regjistruar nga viti 2000 e deri më sot.
Kjo u bë e ditur nga statistika zyrtare të Policisë së Kosovës, e që mesatarja i bie të jetë 120 persona në vit.
E vetëm gjatë vitit të kaluar, 7 mijë e 676 pacientë morën trajtim në Klinikën Emergjente të Qendrës Klinike Universitare të Kosovës.
Drejtori i kësaj Klinike, Naser Syla thotë se pacientët me trauma dhe aksidente zënë vendin e dytë për nga numri i përgjithshëm që marrin trajtim aty.
“Një mijë e 297 prej tyne janë intervenu dmth janë bërë intervenime po foli për intervenime në sallën e madhe dmth në sallat operative të Qendrës Emergjente. Kurse prej këtyre intervenimeve, 249 pacientë dmth kanë shku në për trajtim mjekim intensiv qendror”, tha Syla.
Syla që ka përvojë më shumë se dy dekada në Mjekësinë Emergjente, tregon se trajtimi i disa rasteve të rënda ndikon emocionalisht edhe te ta.
“…Kur janë në pyetje gjeneratat e reja, kur janë në pyetje fëmijët dhe prindërit janë kah presin jashtë psh dhe e dijnë siç është gjendja e tij dhe në fund duhet për me u dorëzu dhe duhet me ua komuniku me dal me iu thënë po më vjen keq mirëpo fëmija juaj ka vdekë, me të vërtetë është një gjendje shumë e rëndë”, tha ai.
Marrë parasysh këtë, eksperti i komunikacionit thotë se shkaktari kryesor mbetet mospërshtatja e shpejtësisë së lejuar.
“Nuk mundet me u parandalu asnjëherë krejt, sepse jeta është relative nuk është absolute asgjë. Mirëpo e kemi cek disa herë që qytetet duhet ta kenë një polici lokale dhe pastaj të bazohemi shumë në inteligjencën artificiale, jo pak po shumë baza kryesore të jetë inteligjenca artificiale, kemi cekë disa herë radarët mobilë statik dhe kamerat dhe Policia jonë ta kryejë punën siç duhet”, thotw Bekim Ahmeti – njohës i komunikacionit.
Në disa prej qyteteve tashmë janë vendosur edhe kamera sigurie që menaxhohen nga Policia e Kosovës, me të cilat është synuar të ulet numri i aksidenteve dhe shkeljeve të ndryshme.
