I lidhur me pranga erdhi edhe njëherë në gjykatore por kësaj radhe për të dëgjuar verdiktin final për akuzën për krime lufte në fshatin Gurrakoc të Istogut.
Të akuzuarin Casllav Jolliqin, gjykata e gjeti fajtor për rrahje, torturë dhe cenim të integritetit trupor ndaj popullatës civile në rrafshin e Dukagjinit gjatë viteve 1998-99.
Gjyqtari Musa Konxheli lexoi rastin e Zef Malsisë, ku policët serb e kishin rrahur deri në alivanosje atë vetëm se kishte sjellë dy gazetarë ndërkombëtar në vendin ku ishte rrëzuar një helikopter i forcave policore ushtarake serbe.
“Për këtë shkak e sulmojnë fizikisht Dy prej policëve të uniformuar e kanë kapur për krahu dhe në prezencë të gazetarëve kanë filluar ta godasin me grusht dhe shqelma për një periudhë kohore rreth 20 minuta”, tha Musa Konxheli- kryetar i trupit gjykues.
Pas leximit të akuzave ndaj dhunës ndaj personave të tjerë, gjykata e shpalli vendimin ndaj serbit Jolliq.
“E gjykon të akuzuarin Casllavjolliq për veprën penale krimi i luftës kundër popullsisë civile, në dënim burgimi në kohëzgjatje prej 8 vjet”, ishte vendimi i lexuar nga kryetari i trupit gjykues.
Megjithatë, vetë të dëmtuarit Nexhmendin Curri, i cili ishte viktimë e dhunës së Jolliq, dënimi prej 8 viteve i është dukur i ulët.
“Bile diçka u bo ma në fund u bo diçka, nuk është i mjaftueshëm..drejtësia të shkon në vend, kush ka bo krime dihet, na kojshi jem kon me to u duft mi menu kto tana”, tha Nexhmedin Curri, i dëmtuar nga Jolliq.
Të padrejtë këtë vendim e ka cilësuar edhe avokati i Casllav Jolliq.
“Ky aktgjykim jo vetëm qëështë i kundërligjshëm po është edhe gjynah qysh thotë populli shumë gjynah i madh bile sepse për këtë njeri nuk ekziston prova”, u shpreh ai.
Prokuroria Speciale e Republikës së Kosovës më 18 nëntor 2022 ka ngritur aktakuzë ndaj ish policit serb, Jolliq, derisa gjykimi kishte filluar pas një muaji.
