Gjashtë projekte të reja të financuara përmes Programit të Bashkëpunimit Ndërkufitar IPA III Kosovë-Maqedoni e Veriut 2021-2027 kanë nisur zbatimin, me një vlerë totale prej 3.24 milionë eurosh.
Ministri i Administrimit të Pushtetit Lokal, Elbert Krasniqi, ka bërë të ditur se projektet financohen nga Bashkimi Evropian dhe synojnë zhvillimin e komunave dhe komuniteteve në të dyja vendet.
Projektet, sipas tij, përfshijnë fusha si mbrojtja e mjedisit, përshtatja ndaj ndryshimeve klimatike, menaxhimi i rreziqeve, turizmi, përfshirja sociale dhe rritja e konkurrueshmërisë.
“Në Kosovë, aktivitetet do të shtrihen në Parkun Kombëtar “Sharri” dhe në komunat: Ferizaj, Kllokot, Mamushë, Rahovec dhe Ranillug, ndërsa në Maqedoninë e Veriut në Parqet Kombëtare “Sharri” dhe “Mavrovë”, si dhe në komunat: Brvenicë, Butel, Gazi Babë, Gostivar, Mavrovë dhe Rankovc”, ka shkruar ai në Facebook.
Krasniqi ka theksuar se Ministria do të vazhdojë të mbështesë bashkëpunimin ndërkufitar dhe projektet që sjellin zhvillim dhe përmirësojnë cilësinë e jetës së qytetarëve.
“Mirënjohje për Bashkimin Evropian për mbështetjen e vazhdueshme dhe për partneritetin me institucionet e Kosovës dhe Maqedonisë së Veriut”, ka përfunduar Krasniqi./teve1.info/
