Presidenti i Serbisë, Aleksandër Vuçiq, po fillon formimin e një partie të re të quajtur “Lëvizja Popullore për Shtetin” dhe në periudhën e ardhshme do të vizitojë të gjitha anët e vendit për ta bërë të ditur këtë, ka konfirmuar presidenca serbe.
Nga e shtuna e 11 marsit bëhet e ditur se ai do të fillojë bisedimet me popullatën në jug të Serbisë, me shumë gjasa në Vranjë.
Në qarqet politike serbe ka kohë që spekulohet se Aleksandër Vuçiq jo vetëm që do të largohet nga kreu i Partisë Progresive Serbe, por do të formojë një parti apo lëvizje të re politike, shkruan nova.
Ndonëse ky zhvillim i ngjarjeve dukej i pabesueshëm, Vuçiq më herët në një konferencë për shtyp kishte shpallur praktikisht krijimin e një blloku të ri politik të “Serbisë së denjë dhe normale”, i cili do të ishte civil dhe kombëtar, transmeton teve1.info.
