28 vjeçari me origjinë nga Peja e që kishte nënshtetësi norvegjeze, u raportua më 30 nëntor në mediat norvegjeze, se kishte vdekur.
I njëjti po vuante dënimin me tre vjet burg në qelitë e Mitrovicës së Sremit në Serbi.
Shkak për këtë dyshohet të jetë shpallja fajtor për kryerjen e veprës penale, prodhim dhe shpërndarje e paautorizuar e narkotikëve.
Në anën tjetër familja e Zymberajt ka ngritur dyshime se Artani mund të jetë vrarë.
Nga ministria e Punëve të Jashtme e Kosovës thanë për tëvë1 se me t’u njoftuar për rastin, kanë kërkuar konfirmim nga autoritetet serbe, por ende nuk e kanë marrë atë.
“Nga Zyra Ndërlidhëse e Serbisë në Kosovë na është komunikuar se janë duke u përpjekur të marrin të dhënat e nevojshme nga autoritetet tjera serbe, por deri tani nuk na kanë ofruar ndonjë informatë me të cilën e konfirmojnë rastin”, thuhet në përgjigje.
Teksa, Ministria e Jashtme e Norvegjisë, shtetas i së cilës ishte Zymberaj, thanë për mediumin se çdo pyetje lidhur me rrethanat e vdekjes së tij, duhet t’u drejtohet autoriteteve serbe.
“Çdo pyetje në lidhje me rrethanat e vdekjes duhet t’u drejtohet autoriteteve serbe. Për shkak të legjislacionit norvegjez për detyrën e fshehtësisë, Shërbimi i Jashtëm nuk është në gjendje t’i komentojë çështjet konsullore askujt tjetër përveç atyre që janë të përfshirë drejtpërdrejt”, thuhet në përgjigje.
Televizioni ka kontaktuar edhe me autoritetet në Serbi për rastin e vdekjes së Zymberajt, por nuk kanë marrë përgjigjje deri në publikimin e kësaj kronike.
Megjithatë nga Ministria e Drejtësisë e këtij vendi, i kanë thënë Radios Evropa e Lirë se Zymberaj vuante nga një sëmundje, për të cilën kishte refuzuar të trajtohej sa ishte në burg.
Për njohësin e çështjeve të sigurisë, Hysen Gecaj, autoritetet e Kosovës duhet të interesohen për rastin e Zymberajt, ndonëse ky i fundit ishte shtetas norvegjez.
“Megjithatë ai ka një prejardhje shqiptare dhe familjart këtu n Kosovë. Patjetër qeveria e Kosovës duhet ta ndijë një obligim dhe t’i japë një përgjigjje kësaj pjese të familjes që është këtu në Kosovë”, tha ai.
Autoritetet serbe kanë bërë të ditur për REL-in se trupit të Artanit i është bërë edhe një autopsi, por rezultatet nuk janë ende të disponueshme për publikun.
Kronika e realizuar nga Gojart Jashari.
