Sadriu për Tëvë1 tregoi se përveç ngritjes së çmimit të biletës, hotelit e karburanteve, është ngritur edhe çmimi i taksës në Arabinë Saudite nga 400 në 2000 euro.
“Është një ndryshim i madh nga viti 2019 nga Haxhi i fundit, çmimi ka qenë 4150 euro ndërsa tani 5700 euro, pra është një diferencë. Por, kemi të bëjmë me një periudhë kohore të krizës dhe pandemisë që ka shkaktuar probleme. Çmimi në 5700 euro ka shkuar sepse shërbimet të cilat kanë qenë, një lloj takse që ka qenë për ta paguar sapo të zbresim në Arabinë Saudite, ajo taksë nga 400 euro ka shkuar në 2000 euro. Pastaj, bileta, karburantet, hotelet. Pra, të gjitha këto kanë qenë shkak të vijnë deri tek ngritja e këtij çmimi”, ka thënë ai në emisionin “InfoNata”.
Ndërsa, tutje ai tha se në këtë vit Arabia Saudite ka kufizuar numrin e haxhive.
Sa i përket haxhive të Kosovë, Sadriu bëri të ditur se do shkojnë afro 730 prej tyre, me datë 28 dhe 29 të po këtij muaji.
“Sivjet numri i haxhive është i kufizuar, vetë shteti i Arabisë Saudite e ka kufizuar numrin. Vetëm 1 milion ka lejuar që këtë vit të ketë Haxhi, prej tyre 20 përqind janë vendas, 80 përqind janë të huaj. Ne këtë vit së pari e kanë caktuar 706 Haxhi, ndërsa tani së fundmi na kanë lejuar ndoshta edhe 15 të tjerë. Jemi diku afro 730 që do shkojmë këtë vit. Dhe parashihet që me datë 28 dhe 29 të këtij muaj do bëhet udhëtimi, kthimi do jetë 19 apo 20 korrik”, tha tutje ai.
