Sekretarja e përgjithshme e Partisë Socialdemokrate (PSD), Teutë Rrusta, ka reaguar pas deklaratave të komisioneres për Informim dhe Privatësi, Krenare Sogojeva-Dermaku, pasi kjo e fundit ka paralajmëruar padi ndaj partisë për publikimin e të dhënave personale të qytetarëve.
Rrusta ka thënë se kjo çështje po kthehet në problem politik, raporton teve1.info.
“Nga vullnet politik, 200.000 nënshkrimet kundër Asociacionit, po kthehet në problem politik”, ka shkruar ajo në Facebook.
Sipas saj, vullneti është i lirë, dhe prandaj krijon tension me forcat autoritare që tentojnë ta përkufizojnë.
Rrusta ka deklaruar se aksioni i djeshëm kishte për qëllim shpërfaqjen e këtij tensioni në rritje.
“Aksioni dje e kishte qëllim shpërfaqjen e këtij tensioni, në rritje”.
PSD, dje gjatë ditës para Qeverisë së Kosovës ka vendosur 205 mijë nënshkrimet e qytetarëve të peticionit të vitit 2016-të kundër marrëveshjes për Asociacionin e Komunave me Shumicë Serbe.
