Partia Socialdemokrate është gjobitur nga Policia e Kosovës, pasi nuk ka paralajmëruar për protestën kundër formimit të Asociacionit të Komunave me shumicë serbe, më 25 mars të këtij viti.
Kështu ka bërë të ditur Teutë Rrusta nga radhët e kësaj partie, e cila tha shantazhi me financa ka filluar pasi nuk iu shkoi ajo me polici.
Ajo tha se nëse dëshirojnë se kjo parti të ofrojë skenarët e protestave dhe aksioneve, nuk do të ndodhë.
“Edhe një gjobë e re ndaj PSD-së, sot. Tash për protestën e fundit. Në raport të policisë ndëshkohemi për mos njoftim të protestës. Ani pse kemi njoftu, publiku, bërë thirrje e çka jo. Metoda po dihet, logjika u kuptua. Nëse dojnë prej neve me ua ofru skenarët e protestave dhe aksioneve, le ta dinë që kjo nuk ka me ndodhë.
E drejta për protestë, përdorimi i hapësirave publike nuk munden me u cenu prej asnjë pushteti. Ato janë tonat. Shantazhi me financa ka filluar pasi nuk iu shkoi ajo me polici. Dobët, dobët”, ka shkruar ajo në Facebook.
