Nga target ilegale shumë serbë të veriut, kanë hequr dorë.
Targat ilegale ata po i konvertojnë në targa të Republikës së Kosovës.
Për vetëm 11 ditë të këtij muaji, sipas Ministrisë së Punëve të Brendshme, janë konvertuar mbi 1 mijë e 500 targa.
“Deri më tani, janë regjistruar 1570 automjete nga targat ilegale në targat RKS, ku pronar të këtyre automjeteve janë 1480 qytetarë dhe 3 biznese”, thuhet nga MBP.
Kjo si çështje në fund të muajit pritet të procedohet në Kuvendin e Komunës së Mitrovicës së Veriut, ku zyrtarë të kësaj komune besojnë se deri në fund të të afatit të gjitha targat do të konvertohen.
E nga partia në pushtet thonë se interesimi i serbëve për të konvertuar targat, vjen pas veprimeve institucionale kundër krimit në veri.
“Lufta e institucioneve të Republikës së Kosovës dhe konsistenca në luftimin e krimit dhe grupeve kriminale atje, ka bërë që qytetarët serb të çlirohen dhe të ndihen të lirë nga ato grupe kriminale dhe tash kemi nje fluks të shtuar dhe situatë tërësisht ndryshe atje”, ka thënë Manxhuka.
Konvertimi i targave nga ilegale në RKS, me vendim të qeverisë do të lejohet deri më 1 dhjetor, e pas kësaj date, automjetet me targa ilegae nuk do të kenë më mundësinë t’i regjistrojnë me targa RKS,të hyjnë apo të qarkullojnë në dhe përmes territorit të Republikës së Kosovës.
