Këto deklarata ai i ka bërë gjatë fjalimit para protestuesve në sheshin “Carl Lazar” ku po kundërshtohej suspendimi i ish-komandantit të Drejtorisë së Policisë rajonale në veri, Nenad Gjuriq.
“Dje kemi dhënë dorëheqje, sot po ua kthejmë mandatin, pasi ju na keni zgjedhur e jo Prishtina”, ka thënë Rakiq.
Kurse, nënkryetari i Listës Serbe, Igor Simiq ka deklaruar se po luftojnë për paqe dhe stabilitet për të gjithë qytetarët pa dallim etnie.
“Çka fituam? Luftojmë për paqe, për stabilitet. Edhe për serbët edhe për shqiptarët edhe për boshnjakët edhe goranët e të gjithë të tjerët”, ka thënë ai.
Tutje, Simiq e përmendi deklaratën e kryeministrit të Kosovës, Albin Kurti i cili tha se nuk ka komuna serbe në Kosovë por ato janë me shumicë serbe.
“Para disa ditësh Kurti tha se s’ka komuna serbe në Kosovë, tash s’ka institucione të Prishtinës në veri të Kosovës”, ka thënë Simiq.
Ndërkaq, ish-drejtori i Policisë së Kosovës për veri, Nenad Gjuriq, ka thënë se nuk kanë tokë tjetër dhe se do “në tokën e tij të mbjellë lule që do të përhapin erën e paqes”.
Pjesëmarrës ishte edhe ish-kryetari i Mitrovicës së Veriut, Milan Radojeviq i cili falënderoi të gjithë protestuesit dhe deklaroi se “po dërgohet mesazh paqeje”.
“Për nëntë vjet i dhamë një rast Marrëveshjes së Brukselit, fatkeqësisht nuk ia dolëm. Sot në mëngjes zyrtarisht dorëzuam dorëheqjet. Lufta jonë vazhdon, do të jetë vetëm në një formë tjetër”, ka thënë Radojeviq.
