Përmes një postimi në Facebook, ajo tha se të vrarët në këtë masakër u shndërruan në shënjestër të mizorisë serbe sepse ishin shqiptarë dhe donin të jetonin të lirë.
“24 vjet më parë, 23 anëtarë të familjes Deliu, të moshave 2 deri në 94-vjeç u masakruan nga pushteti gjenocidal serb, teksa po e kërkonin shpëtimin maleve, duke ikur nga barbaria e forcave të regjimit të Serbisë. Ata qenë shndërruar në shënjestër të mizorisë serbe, sepse ishin shqiptarë dhe sepse donin të jetonin të lirë në vendin e të parëve të tyre”, thuhet ndër tjerash në postimin e saj.
Tutje, Osmani u shpreh se sot ata kujtohen me dhimbjen e njëjtë, teksa kjo dhimbje, thotë ajo, bëhet edhe më e madhe sepse vazhdon të mbetet e pandriçuar nga drejtësia.
“Sot, i kujtojmë me dhimbjen e njëjtë me atë të asaj dite dhe të secilës ditë të mëpastajme. Kjo dhimbje bëhet edhe më e madhe teksa kjo masakër, dëshmi e egërsisë së forcave serbe, vazhdon të mbetet e pandriçuar nga drejtësia. Planifikuesit dhe ekzekutorët janë të lirë, shteti që i sponsorizoi i pabindur për përmasën e krimeve të kryera e familja në pritje të drejtësisë. Ne do t’i vazhdojmë përpjekjet që ata të cilët e kryen këtë akt mizor të dalin para drejtësisë. Këtë ua kemi borxh viktimave dhe familjeve të tyre!”, thuhet në postim./teve1.info/
