Për më shumë se tre vite nga arrestimi, Nezir Mehmetaj vazhdon të mbahet në Serbi nën akuza për krime lufte. Në një intervistë për Tëvë1, nëna Nazlia ka rrëfyer mes lotësh si u arrestua biri i saj në Merdarë. Ajo tha se që nga momenti që e kanë burgosur e deri më tani të birin e ka parë vetëm një herë
Janë bërë më shumë se tre vite që kur Nezit Mehmetaj nga fshati Rudnicë e Komunës së Klinës është arrestuar pikëkalimin kufitar në Merdarë nga autoritet e Serbisë, nën akuzat për kryerje të krimeve të luftës ndaj popullsisë joshqiptare gjatë luftës në Kosovë në vitin 1999.
Mehmetaj i cili jetonte në Zvicër ishte duke u kthyer nga Serbia për në Kosovë, pasi atje raportohet se kishte shkuar më nënën e tij për shërimin e saj.
E Nëna e tij, Nazlia mes lotësh rrëfen për Tëvë 1, se si u arrestua biri i saj në Merdarë.
Ajo tha se që nga momenti që e kanë burgosur e deri më tani të birin e ka parë vetëm një herë.
“Qe tri vjet e katër muaj vetëm një herë e kam parë një orë. Tash s’po muj jam pa qef. Çdo ditë më shtohet malli për të e mërzia e tonat. Ma ligsht mu dok edhe pse mu pom thotë mirë jom, nashta s’po donë mum mërzit mu”, thotë ajo.
Nëna Nazlie thotë se tashmë kanë humbur edhe atë pak besim që kanë pasur në institucione të Drejtësisë.
Sipas saj, shpresa për tu kthyer biri i saj në Kosovë çdo ditë e më shumë po shkon duke u zbehur.
Ajo thotë se kanë paguar me qindra para avokat për ta nxjerrë djalin e saj, mirëpo një gjë e tillë ende nuk ka ndodhur.
“Ministrja e Drejtësisë ka bërë kërkesë që të transferohet në Kosovë por na jo se nuk na vet kërkush. S’kemi lon vend pa kërku ndihmë por kurgjo. S’na ka ndihmu kërkush kurgjo. 60 mijë euro i kemi dhënë që në momentin që e kanë shti në burg. Na e morën avokat tu na thënë ua lëshojmë djalin e kurgjo. Gati 4 vjet po bëhen duke ia shtyrë çdo muaj seancat”, thotë ajo.
Ajo numëron ditët e lirimit të djalit të saj, ani pse është mjaft e zhgënjyer.
Dhimbje të më madhe nuk ka, thotë ajo.
“Në oborr me pa thom nuk e kanë lëshuar hala qaq jam e zhgënjyer prej krejtëve. Po pres boll edhe po i numërojë ditët kur ka mu liru. Kur po vjen koha kurgjo. Po dufke me duru njeri gjithçka. Nuk ka dhimt më të madhe se kjo”, shprehet Mehmetaj.
Ndërkohë seanca gjyqësore ndaj Mehmetaj është planifikuar të mbahet më datën 8 të muajit të ardhshëm.
Kronika e realizuar nga gazetarja Fitore Berisha
