Në tryezën për Ditën Ndërkombëtare “Zero Diskriminim”, të organizuar sot nga Institucioni i Avokatit të Popullit u tha se janë mbi 200 mijë persona me aftësi të kufizuara që jetojnë në Kosovë dhe janë kategoria më e diskriminuar të cilët kanë pengesa në qasje publike, shkruan Teve1.info.
Avokati i Popullit, Naim Qelaj ka bërë hapjen zyrtare të vitit për personat me aftësi të kufizuara. Ai tha se Kosova tashmë e ka Ligjin kundër Diskriminim, por që i njëjti nuk është implementuar në gjykatat tona.
Merita Tejeci Çela nga Institucioni i Avokatit të Popullit është shprehur se shqetësuese vazhdon të mbetet mungesa e qasjes së duhur dhe të pa penguar të personave me aftësi të kufizuara.
“144 mijë deri në 270 mijë persona mendohet që janë personat me aftësi të kufizuara. Edhe më tutje këta persona kanë pengesa në qasje publike”, tha ajo.
Edhe anëtari i Komisionit për të Drejtat e Njeriut, Alban Bajrami në këtë tryezë ka thënë se grupi më i diskriminuar janë personat me aftësi të kufizuara.
“Diskriminimet e të gjitha llojeve nuk kanë arritur të marrin dënimin e duhur. Kjo na ka shtyrë si komision që ta rishkruajmë Ligjin kundër Diskriminim dhe të adresojë sfidat e kësaj kategorie gjatë pandemisë. Sepse gjatë pandemisë ka pasur shkelje të drejtave të njeriut, ata që kanë vuajtur më së shumti kanë qenë personat me aftësi të kufizuara”, është shprehur Bajrami.
