Sipas tij, instituti duhet të jetë i pavarur, ndërsa ka vlerësuar se Ligji për këtë institut do të marrë kohë deri në një vit për të hyrë në fuqi.
“Krijimi i institutit është me shumë vonesë, duhet ta dinë që ka kaluar shumë kohë nga masakrat në Kosovë e shumë njerëz kanë vdekur. Instituti duhet të jetë i pavarur, teksa unë kam shprehur vullnet të jem në dispozicion në çka ka të bëjë me Kosovën. Unë besoj që edhe pas aprovimit të këtij koncept dokumenti, do të kalojë edhe 1 vit deri sa të aprovohet ligji në parlament. Është e pamundur të bëhet një ligj i përshpejtuar për një kohë të shkurtër, kjo u vërtetua. Instituti duhet të krijohet pa ndërhyrje politike.”, tha Lluka në emisionin “Ditari”.
Tutje, Lluka në Tëvë1 tha se instituti duhet të ketë shumë gjëra të veta dhe të pavarura nga Ministria e Drejtësisë.
Gjithashtu, shtoi se një institut i tillë ka ekzistuar edhe në Qeverinë e parakohshme.
Qeveria e Kosovës ka miratuar Projektligji për Institutin e Krimeve të kryera gjatë Luftës në Kosovë, që përcakton themelimin, organizimin, funksionimin dhe përcaktimin e kompetencave të Institutit për Krimet e Kryera Gjatë Luftës në Kosovë, i cili do të funksionojë si Agjenci në kuadër të Zyrës së Kryeministrit.
Kujtojmë se Instituti për hulumtimin e krimeve të luftës për herë të parë është themeluar në vitin 2011. Mirëpo, është mbyllur në vitin 2018 teksa punën e tij e ka vazhduar Divizioni për Drejtësi Tranzicionale, në kuadër të Ministrisë së Drejtësisë.
Po ashtu, përpjekjet për (ri)themelimin e institutit të ngjashëm kanë filluar që nga viti 2020, në kohën kur Qeveria “Kurti 1” ishte në detyrë, e ku pos hetimit të krimeve të luftës, ky institut parashihej të merrej edhe me gjenocidin.
