Përmes komunikatës, është bërë e ditur se Kurti i theksoi suksesin e arritur në Procesin e Berlinit përmes nënshkrimit të tri marrëveshjeve.
Sipas njoftimit, ai ka njoftuar ata me mbarëvajtjen e punës në institucione por edhe situatën e sigurisë në përgjithësi me theks në pjesën veriore.
“Ai i njoftoi miqtë francez me mbarëvajtjen e punës së institucioneve, situatën e sigurisë në përgjithësi, me theks në pjesën veriore të Kosovës, përkushtimin për Agjendën e Reformave Evropiane dhe përsëriti urgjencën për mbylljen e procesit të liberalizimit të vizave për Kosovën”, thuhet në njoftim.
Gjatë takimit, Kurti tha se se bojkoti i institucioneve nga serbët në veri është i nxitur dhe orkestruar nga Beogradi zyrtar dhe është rezultat i veprimeve të tyre të vazhdueshme destruktive në dialogun ndërmjet dy vendeve.
“U diskutua edhe për zhvillimet e ditëve të fundit. Kryeministri Kurti tha se bojkoti është i nxitur dhe orkestruar nga Beogradi zyrtar dhe është rezultat i veprimeve të tyre të vazhdueshme destruktive në dialogun ndërmjet dy vendeve. Ai ritheksoi se Qeveria e Kosovës është e përkushtuar për ta vazhduar dialogun dhe e angazhuar për rend dhe sundim të ligjit, paqe e siguri në Kosovë dhe rajon”, thuhet në njoftim./teve1.info/
