Zyra e Kryeministrit të Kosovës ka njoftuar se gjatë takimit, Kurti ka falënderuar Ernst për përkrahjen e Gardës Kombëtare të Ioëas për ngritjen e kapaciteteve dhe zhvillimin e Forcës së Sigurisë së Kosovës.
Sipas Kurtit, mbështetja e tillë është bërë edhe më e domosdoshme pas invazionit rus dhe aleancës ushtarake mes Serbisë dhe Rusisë.
“Në takim u bisedua për zgjerimin dhe thellimin e partneritetit strategjik ndërmjet Republikës së Kosovës dhe Shteteve të Bashkuara të Amerikës, veçanërisht bashkëpunimin në fushën e mbrojtjes dhe fushat zhvillimore”, thuhet ndër tjerash në njoftim..
Tutje, ZKM-ja bën të ditur se në takim, Kurti e ka njoftuar senatoren për fillimin e reformës në drejtësi dhe ngritjen e theksuar të buxhetit për bujqësi dhe pensione.
“Kryeministri Kurti e njoftoi për fillimin e reformës në drejtësi dhe ngritjen e theksuar të buxhetit për mbrojtje, rritjen e mbështetjes për bujqësi, rritjen e pensioneve për 11% dhe pensioneve për persona me aftësi të kufizuara për 33%, arsimimin publik falas përfshirë nivelin universitar. Ai theksoi indikatorët pozitivë ekonomik që po sjellë stabiliteti institucional në vendin tonë, përfshirë rritjen dyshifrore ekonomike, rritjen e të hyrave doganore për 31%, rritjen e të hyrave tatimore për 34.3%”, përfundon njoftimi./teve1.info/.