Përmes një reagimi, Kolegjiumi i Kirurgëve është shprehur se Osmani ka anashkaluar këtë institucion në trajtimin e saj shëndetësor, pa u konsultuar fare me personelin udhëheqës.
Sipas reagimit, presidentja i është nënshtruar një procedure e cila në Klinikën e Kirurgjisë Abdominale është rutinë ditore që nga viti 1999 me përqindje të suksesit 99.9 për qind.
“Injorimi dhe nënçmimi që presidentja i ka bërë kolegjiumit të Kirurgëve e në veçanti institucionit mbi të cilat udhëheqë është e papranueshme për të gjithë”, thuhet ndër tjerash në reagim.
Ndryshe, Osmani i është nënshtruar një intervenimi të lehtë kirurgjik i cili është realizuar me sukses të mërkurën.
Përmes komunikatës, Presidenca ka njoftuar se Osmani ka bërë bartjen e përkohshme të përgjegjësive te kryetari i Kuvendit, Glauk Konjufca.
“Zyra e Presidentes së Republikës së Kosovës njofton opinionin publik se dje (2 nëntor), pas rekomandimit nga mjekët specialistë, Presidentja e Republikës së Kosovës, Vjosa Osmani i është nënshtruar një intervenimi të lehtë kirurgjik (heqja e tëmthit), i cili është realizuar me sukses. Bazuar në vlerësimin dhe vullnetin e saj, gjatë ditës së djeshme, Presidentja Osmani ka bërë bartjen e përkohshme të përgjegjësive të Presidentes së Republikës tek Kryetari i Kuvendit të Republikës së Kosovës, z. Glauk Konjufca”, thuhet në komunikatë.
Tutje, është bërë e ditur se nga e enjtja, Preisdentja do të vazhdojë me ushtrimin e detyrave dhe obligimeve kushtetuese që ndërlidhen me pozitën e saj.
“Nga 3 nëntori, Presidentja do të vazhdoj me ushtrimin e detyrave dhe obligimeve kushtetuese që ndërlidhen me pozitën e Presidentes së Republikës, si dhe gradualisht do t’i kthehet angazhimeve publike. Gjatë kësaj periudhe, kërkojmë mirëkuptimin e medieve për të respektuar të drejtën fundamental për privatësi të Presidentes, që është e garantuar me kushtetutë”, thuhet në njoftim./teve1.info/
