Abdullah Klinaku në “Info Nata” në tëvë1 tha se përgjatë viteve të fundit në Kosovë ka pasur zhvillime të rëndësisë së veçantë për të cilat ka pasur nevojë të ketë pikëpamje të ndryshme të demokracisë.
Klinaku tregon se gjatë kësaj periudhe kjo ka munguar dhe se për këtë kanë vendosur ta krijojnë këtë klub i cili do t’i promovojë disa vlera mbi një premisë të demokracisë konservatore.
“Besoj në këto vite në Kosovë ka pasë disa tema të cilat kanë qenë të rëndësisë së veçantë dhe ndërlidhen me disa koncepte politike dhe vlerëismin e rrethanave dhe rrjedhave sociale e politike prej prizmeve të ndryshmeve të koncepteve aktuale politike, prej formave të ndryshme të demokracisë. Derisa kemi pasë diskutime me shokë që ishin të shqetësuar për rrjedhën ku po ecë shoqëria jonë, kemi ardhë në konkluzion që është e nevojshme të ndërtohet një strukturë organizative sociale intelektuale që do t’i promovojë disa vlera mbi një premisë ose paradigmat e demokracisë konservatore”, tha ai.
Sipas tij, nëse rrjedhat aktuale të temave të ndryshme në vend vlerësohen përmes konceptit të këtij klubi, do të ketë mundësi t’iu jipen përgjigje shumë dilemave që janë prezente në shoqëri.
“Pra përveç që është emërtim, të njëjtën kohë është koncept që në rrjedhat aktuale që po kalon vendi ynë, familjet shqiptare dhe shumë rrjedha tjera besojmë që nëse i vlerësojmë rrethanat reale prej prizmit të demokracisë konservatore, do të kemi mundësi t’i japim përgjigje shumë dilemave që aktualisht janë në shoqërinë tonë prandaj e kemi emërtuar në këtë formë, e kemi bërë publike se jemi duke punuar në mundësitë tona për me i mbledhë njerëzit të cilët kanë mundësi të japin kontribut”, shtoi ai.
Ai tha se Klubi “Demokracia Konservatore” është organizim qytetar dhe përpjekje për bashkimin e intelektualëve, aktivistëve dhe qytetarëve rreth vlerave që i kultivon demokracia konservatore si koncept politik e kulturor. /teve1.info/
