Këto kërkesa ai i ka bërë në letrën drejtuar Kurtit, ku ndër tjerash thotë se momenti aktual është i ndjeshëm dhe mund të rrezikohet procesi drejt Marrëveshjes Finale me Serbinë.
“Me shqetësim po e përcjell situatën e sigurisë në veri të vendit, pas vendimit tuaj të fundit për targat. Askush, as brenda Kosovës e as partnerët tonë ndërkombëtar nuk e konteston të drejtën e Kosovës për të zbatuar ligjin në mbarë territorin e vendit. Por, momenti aktual është i ndjeshëm dhe kërkon maturi e gjakftohtësi, në mënyrë që të mos rrezikohet procesi drejt Marrëveshjes Finale mes Kosovës dhe Serbisë”, thuhet ndër tjerash në letër.
Tutje, Haradinaj kërkon nga kryeministri që të pranojë kërkesën e Amerikës për shtyrjen e zbatimit të vendimit për konvertimin e targave ilegale.
“Prandaj, ju kërkoj që me urgjencë të pranoni kërkesën e Amerikës për shtyrjen e zbatimit të vendimit për targat ilegale në afatin e kërkuar dhe të ndërpreni veprimet që keni marrë deri tani për zbatimin e vendimit në fjalë. Njëkohësisht ju kërkoj që deri në Marrëveshjen Finale, të mos ndërmerrni asnjë veprim që e rrezikon sigurinë e vendit në cilën do pjesë të tij, pa koordinim në plotni me Shtetet e Bashkuara”, thuhet në letrën e publikuar nga Haradinaj.
Po ashtu, kreu opozitar ka inkurajuar Kurtin që të kërkojë ndihmën e Këshilltarit Nacional për Siguri të presidentit Biden, Jake Sullivan për të qartësuar dhe saktësuar veprimet që shtensionojnë situatën aktuale të sigurisë në rajon./teve1.info/
