Ai ka thënë se Asociacioni është obligim që e ka marrë Kosova dhe duhet të zbatohet në përputhje me Kushtetutën e Kosovës.
Haradinaj përmes një postimi në Facebook ka thënë se paraqitja e tij se çështje problematike ka për qëllim kundërshtimin e arritjes së “marrëveshjes së madhe”.
“Diskutimet dhe konsultat për Asociacionin kanë vetëm një synim, heqjen e pengesave të fundit drejt marrëveshjes së madhe me Serbinë, për njohje të ndërsjellë. Ky është një obligim i marrë që duhet të zbatohet në përputhje me kushtetutën e Kosovës dhe këtu çështja mbyllet. Prandaj të gjithë ata që asociacionin e paraqesin si çështje problematike, nuk e kanë hallin te asociacioni, por duan që asociacionin ta përdorin si “mbulesë” për ta kundërshtuar marrëveshjen e madhe”, ka shkruar ai, raporton teve1.info.
Ai ka thënë se një gjë të tillë po e bënë Serbia por edhe kryeministri i Kosovës.
Sipas tij të gjitha vendimet e dy qeverive në 4- 5 muajt e fundit kanë qenë për ta penguar planin franko-gjerman.
“Këtë po e bën Serbia e fatkeqësisht këtë po e bën edhe Kryeministri i Kosovës. Të gjitha vendimet dhe veprimet e qeverive në Prishtinë e në Beograd, në këta 4-5 muajt e fundit, që nga çështja e targave, tensionet në veri, dalja nga institucionet e serbëve lokalë, e deri te shpallja e zgjedhjeve në veri, kanë qenë obstruksionizëm i Planit Evro-Amerikan. Kjo lojë politike duhet të marrë fund dhe Kosova duhet t’i fokusojë krejt potencialet politike, intelektuale e qytetare në kryetemën e saj që është “marrëveshja e madhe për njohje të ndërsjellë me Serbinë”, e cila mund të arrihet vetëm duke qenë të koordinuar ngushtë me SHBA dhe BE”, ka thënë Haradinaj.
