Kisha Ortodokse Serbe në Kosovë i ka quajtur ‘shpifje flagrante’ pretendimet e deputetes britanike, Alicia Kearns, se ky institucion po i fsheh në kisha armët që po i kontrabandon në Kosovë.
“Në të njëjtën kohë, ne i konsiderojmë akuzat e deputetes britanike, znj. Kearns, kundër Kishës si një keqpërdorim të rrezikshëm të informacionit dhe një shpifje flagrante. Duhet theksuar se deklaratat e saj nuk pasqyrojnë qëndrimin zyrtar të Qeverisë së Mbretërisë së Bashkuar apo NATO-s, por me shumë gjasa bazohen në informacionet e marra nga z. Kurti gjatë vizitës së tij të fundit në Londër. Në intervistën e saj të djeshme, zonja Kearns vazhdoi me akuzat e saj kundër Kishës Ortodokse Serbe, duke shpërfillur deklaratën e KFOR-it që i shpalli këto pretendime si të pabaza”, thuhet ndër të tjerash në një reagim të gjatë të KOS-it.
Madje sipas këtij institucioni, kryeministri Kurti përmes dhënies së deklaratave të njëjta si të Kearns, po nxit intolerancë etnike e fetare.
“Këto deklarata, të cilat bëjnë thirrje për kriminalizimin kolektiv të serbëve, e përkeqësojnë më tej një situatë tashmë jashtëzakonisht të vështirë dhe të brishtë”, thuhet tutje në reagim, përcjell teve1.info.
Sipas Dioqezës, “mbi 2000 familje serbe nga veriu i Kosovës janë detyruar të braktisin shtëpitë e tyre për shkak të represionit policor në vetëm disa muajt e fundit” dhe po ushtrohet represion ndaj serbëve.
“Ndaj, me të drejtë mund të themi se jemi përpara një përsëritjeje të pogromit (dëbimit) të marsit 2004, vetëm me metoda të ndryshme, por dukshëm me të njëjtat objektiva”, thuhet në komunikatë.