Sipas Demhasaj, ligji është dashur të vendosë një kohë të caktuar se sa ditë është dashur një ushtar i UÇK-së të jetë pjesëtar i ushtrisë për t’a marrë pensionin.
“Problemi është edhe ligjor sepse veteran i UÇK-së është kushdo që ka kontribuuar në luftë, por a i takon e drejta për t’a marrë këtë pension, këtu mund të diskutohet, prandaj ligji është dashur të vendosë një kohë të caktuar, se sa ditë është dashur një ushtar i UÇK-së të jetë pjesëtar i ushtrisë për të mbërri t’a marrë pensionin. Prandaj këto nuk janë rregulluar, problemi është që ne kemi pasur një komision qeveritar i cili ka pasur hallkën e fundit të verifikimit të listave sepse kjo ka shkuar me aplikim”, u shpreh ai.
Ai tha që sipas ligjit kushdo që pretendon që ka qenë pjesëtar i UÇK-së duhet ta plotësojë një formular për të drejtën e statusit të veteranit.
“Ligji thotë se kushdo që pretendon që ka qenë pjesëtar i UÇK-së, e plotëson një formular dhe aplikon për të drejtën e statusit të veteranit. Pastaj kanë qenë hallkat e verifikimit shkallë, shkallë deri tek komisioni qeveritar që ka bërë verifikimin final dhe janë publikuar listat, dhe ata njerëz e kanë fituar atë të drejtë të veteranit dhe njëkohësisht edhe të pensionimit”, tha Demhasaj.
Demhasaj përmend faktin që ligji i vitit 2017 ka përcaktuar pagat për veteranët e shkallës së parë, shkallës së dytë dhe të tretë.
“Te çështja e rritjes e numrit të veteranëve reflekton tek pagesa e veteranëve të vërtetë, nuk është e vërtetë sepse ligji i vitit 2017 i ka përcaktuar, veteranë i shkallës së parë i cili paguhet 25o euro, i shkallës së dytë 170 euro dhe i shkallës së tretë paguhet 120 euro, pra këto janë shumat e përcaktuara , pra nëse do ishte thënë se buxheti për veteranët është 50 milion euro për 1 vit, dhe këto 50 milion euro shpërndahen për aq numër sa ka, ka logjikë, mirëpo edhe pse është me një përqindje të bruto produktit që nuk guxon të jepet më pak ose më shumë, por momentalisht ligji 2017 i ka përcaktuar pagesat sa janë”, shtoi tutje ai.
