Në një konferencë për media pas takimit të Këshillit të ministrave të Jashtëm të BE-së, ai shtoi se situata në Kosovë është më e rrezikshmja që nga vitit 2013.
Po ashtu, ai bëri thirrje nga dy palët që të tregojnë gatishmëri për ecjen përpara dhe të ulin tensionet.
“Duhet të ulen tensionet që po arrijnë në nivele të rrezikshme. Mund të themi se jemi duke u përballur me krizën më serioze e të rrezikshme që nga viti 2013, pra në dhjetë vjetët e fundit. Të dyja palët duhet të tregojnë urgjentisht gatishmëri për të ecur para e t’i ulin tensionet. Nuk është e pranueshme nga asnjëra palë që të injorojë apo shkellë marrëveshjet e arritura në dialog”, tha Borrell.
Ai kërkoi nga Kosova që të nisë edhe themelimin e Asociacionit të komunave me shumicë serbe.
Tutje, ai tregoi se kryenegociatori i Kosovës, Besnik Bislimi do të qëndrojë mbrëmjen e së hënës në Bruksel për të folur rreth çështjes së targave.
Madje, pjesë e bisedimeve të sotshme do të jetë edhe kryenegociatori serb, Petar Petkoviq.
“Do të nisim takime me kryenegociatorët. Pala kosovare po vjen sonte, jam i gatshëm të bisedojë me liderët, nëse negociatorët arrijnë te një zgjidhje praktike te çështja e targave dhe atë para 21 nëntorit, që është afati i fundit. Nuk mund të arrijmë këtë datë, pasi do të jemi në situatë të rrezikshme. E dini se tërheqja e serbëve në veri nga Policia, gjyqësori, ka krijuar një vakum. Në këtë vakum më e keqja mund të ndodh. Mesazhi nga Këshilli është i qartë, dyja palët duhet të tregojnë fleksibilitet, na duhet progres i qartë. Kemi prezantuar një propozim. Falënderojmë Gjermaninë e Francën që kanë përkrahur këtë propozim. Serbët e Kosovës duhet të kthehen në institucione të Kosovës, autoritetet e Kosovës të tregojnë fleksibilitet për targat, e të punojnë në implementimin e Asociacionit të komunave me shumicë serbe pa vonesa”, ka thënë Borrell.
