Në një reagim në Facebook kjo parti ka akuzuar kryeministri Kurti për manipulim të shifrave.
“Me qenë se kryeministri Kurti po flet për “rezultate historike” të qeverisjes së tij, e sigurojmë popullin e
Kosovës se shifrat flasin ndryshe. Ai vazhdon me manipulimin që e ka bërë profesion primar të tij. Kurti e di mirë se qytetarët në përgjithësi nuk shikojnë raportet e buxhetit e as statistikat e Agjencisë së
Statistikave të Kosovës (ASK). Vet raportet e buxhetit dhe statistikat zyrtare i rrëzojnë pretendimet e Kurtit për “rekordet e tij”, e gjithashtu ato flasin për dështimin total në qeverisje”, thuhet në reagimin e AAK-së, shkruan teve1.info
Në mbledhjen e Qeverisë të mërkurën Kurti tha se kanë ndarë mbi 750 milionë euro mbështetje për qytetarët në përballimin e krizës ekonomike.
Ai tha janë rritur edhe të hyrat nga ATK e Dogana, ndërsa theksoi se vendi ka pasur “rritje ekonomike historike”
“Rritje ekonomike historike për vendin tonë për vitin që shkoi me 10.7 %, ndërsa në çerekun e parë të këtij viti kemi 4.9% të Bruto Produktit Vendor”, tha Kurti.
Ai tha se vendi nuk ka pasur qeverisje më të mirë, por që sipas tij, duhet ende punë për të bërë.
